گاؤں سلطان کوٹ کے نزدیک ریلوے ٹریک پر دھماکے کے نتیجے میں جعفر ایکسپریس کی 4 بوگیاں پٹری سے اتر گئیں۔ پولیس کے مطابق دھماکے سے جعفر ایکسپریس متاثر ہوئی اور اس کے 4 مسافر زخمی ہو گئے، جنہیں فوری طبی امداد کے لیے اسپتال منتقل کر دیا گیا ہے۔ دھماکے کی نوعیت معلوم کرنے کے لیے بم ڈسپوزل اسکواڈ کو طلب کیا گیا ہے، جو متاثرہ ٹریک سے شواہد اکٹھا کر رہا ہے۔
پولیس کا کہنا ہے کہ دھماکے کے بعد ٹرینوں کی آمدورفت عارضی طور پر معطل کر دی گئی ہے اور مسافروں کو بسوں کے ذریعے روانہ کرنے کے انتظامات کیے جا رہے ہیں۔
ڈی ایس ریلوے کے مطابق متاثرہ ٹریک کی مرمت کا کام شروع کر دیا گیا ہے، اور اس میں 8 سے 10 گھنٹے لگ سکتے ہیں۔ تاہم، شام 5 بجے سے پہلے اس ٹریک پر کوئی ٹرین نہیں ہوگی۔
دوسری جانب وزیر داخلہ سندھ ضیا لنجار نے ایس ایس پی شکارپور سے تفصیلات طلب کرتے ہوئے کہا کہ فی الفور واقعہ کی تفتیش کا آغاز کریں، ریلوے ٹریک کو نقصان پہنچانےوالے دہشت گردوں کو جلد گرفتارکیا جائے۔
