پاکستانی اداکارہ اور سوشل میڈیا کی مقبول ترین اسٹار ہانیہ عامر نے اپنے پہلے ڈھاکہ دورے کے دوران ایک تقریب میں بالی ووڈ سپر اسٹار شاہ رُخ خان کے مقابلے میں بنگلہ دیشی ہیرو شکیب خان کا انتخاب کر کے شائقین کو خوشگوار حیرت میں ڈال دیا۔
ہانیہ عامر ان دنوں ڈھاکہ میں مختلف برانڈ ایونٹس اور مداحوں سے ملاقاتوں میں مصروف ہیں، جہاں ان کی آمد شائقین کے لیے جوش و خروش کا باعث بنی ہوئی ہے۔
ایک رنگارنگ تقریب میں اس وقت ماحول مزید دلچسپ ہو گیا جب منتظمین نے اسکرین پر شاہ رُخ خان اور شکیب خان کی جھلکیاں دکھا کر ہانیہ عامر سے پوچھا کہ اگر انہیں دونوں میں سے ایک کا انتخاب کرنا ہو تو وہ کس کو چنیں گی؟
تماشائیوں میں سے زیادہ تر افراد شاہ رُخ خان کا نام لے رہے تھے لیکن ہانیہ نے پُر اعتماد انداز میں شکیب خان کا نام لیا۔ ان کے جواب پر پورا ہال تالیوں اور نعروں سے گونج اٹھا۔
بعدازاں ہانیہ نے وضاحت دی کہ ان کا یہ انتخاب مداحوں کی پسند کے احترام کے طور پر تھا، تاکہ وہ اپنی مقامی فین فالوونگ کو خوش دیکھ سکیں۔
تقریب کی ویڈیو سوشل میڈیا پر وائرل ہوتے ہی بحث چھڑ گئی۔ کچھ صارفین نے کہا کہ ہانیہ نے یہ جواب صرف بنگلہ دیشی مداحوں کو خوش کرنے کے لیے دیا، جبکہ کچھ ان کی ذاتی پسند جاننے کے خواہش مند رہے۔
بنگلہ دیشی مداحوں نے کہا کہ ہانیہ نے دل جیت لیے اور یہ ظاہر کیا کہ وہ اپنے میزبان ملک کی عزت افزائی کرنا جانتی ہیں۔
بھارتی صارفین نے تنقید کرتے ہوئے کہا کہ شاہ رُخ خان ایک عالمی لیجنڈ ہیں، اس لیے ہانیہ کو زیادہ محتاط رہنا چاہیے تھا۔
پاکستانی فینز نے ہانیہ کی حاضر جوابی اور دوستانہ رویے کو سراہتے ہوئے کہا کہ وہ جہاں بھی جاتی ہیں سب کو متاثر کر دیتی ہیں۔
