پاکستان کے معروف میزبان اور اداکار ساحر لودھی نے اپنی اہلیہ کے شوبز سے دور رہنے کی وجہ واضح کرتے ہوئے کہا ہے کہ وہ شہرت کے بجائے سادگی اور اپنی نجی زندگی کو ترجیح دیتی ہیں۔
شوبز کی دنیا میں اکثر ستارے اپنی ذاتی زندگی کو عوام کے ساتھ شیئر کرتے ہیں، مگر ساحر لودھی ہمیشہ اس معاملے میں مختلف نظر آئے ہیں۔
دو دہائیوں سے زائد عرصے پر محیط کیریئر کے دوران، انہوں نے اپنی فیملی کو ہمیشہ میڈیا کی چمک دمک سے دور رکھا۔
ساحر لودھی کئی سالوں سے شادی شدہ ہیں اور ایک بیٹی کے والد بھی ہیں، تاہم ان کی فیملی ہمیشہ عوام کی نظروں سے اوجھل رہی ہے۔
حال ہی میں دعا ملک کے پوڈکاسٹ میں شرکت کے دوران، انہوں نے پہلی بار اس راز سے پردہ اٹھایا کہ ان کی اہلیہ کسی شو یا تقریب میں کیوں نظر نہیں آتیں۔
ساحر لودھی نے بتایا کہ ان کی اہلیہ کا مزاج اور ترجیحات مختلف ہیں۔ وہ میڈیا یا شہرت میں آنے کی خواہش مند نہیں بلکہ ایک پرسکون اور نجی زندگی گزارنا چاہتی ہیں۔
ساحر نے مزید کہا کہ شادی کے ابتدائی دنوں میں اُن کی اہلیہ چند تقریبات میں شریک ہوئیں، لیکن بعد میں خود ہی پس منظر میں رہنے کو ترجیح دی۔
ساحر لودھی کا کہنا ہے کہ ہر انسان کی اپنی زندگی ہے اور اسے اپنی مرضی سے زندگی گذارنے کا حق ہے چاہے وہ اسے جیسے بھی گذارے۔
ان کے مطابق، ’میری جانب سے ان پر کوئی پابندی نہیں ہے، میری اہلیہ اپنی ذات میں ایک مکمل اور باوقار خاتون ہیں اور میں اُن کے فیصلے کی قدر کرتا ہوں۔‘
