امریکی نائب صدر جے ڈی وینس نے کہا ہے کہ غزہ میں حماس یا کسی اور گروپ کی جانب سے اسرائیلی فوجی پر حملہ کیا گیا تھا اور اسرائیل کی جانب سے جوابی کارروائی کی توقع تھی۔ صحافیوں سے گفتگو کرتے ہوئے جے ڈی وینس نے کہا کہ غزہ میں جنگ بندی برقرار ہے، تاہم اس کا مطلب یہ نہیں کہ معمولی جھڑپیں پیش نہیں آئیں گی۔
ان کا کہنا تھا کہ “ہمیں معلوم ہے کہ حماس یا غزہ کے اندر کسی اور گروپ نے ایک اسرائیلی فوجی کو نشانہ بنایا، اور ہمیں توقع تھی کہ اسرائیل اس کا جواب دے گا۔”
امریکی نائب صدر نے مزید کہا کہ صدر ڈونلڈ ٹرمپ کی قیادت میں خطے میں امن و استحکام برقرار رہے گا۔
دوسری جانب حماس نے رفح کے قریب ہونے والے فائرنگ کے واقعے میں ملوث ہونے کی تردید کی ہے۔
اس سے پہلے اسرائیلی وزیراعظم نیتن یاہو کے حکم پر اسرائیلی فوج نے غزہ پر فضائی حملے کرکے 20 فلسطینیوں کو شہید جبکہ 50 کو زخمی کردیا تھا۔
