کولمبیا کے صدر نے ڈرگ ڈیلر کہنے پر ٹرمپ کو کھری کھری سنا دی۔ کولمبیا کے صدر گوستاوو پیٹرو نے امریکی صدر ڈونلڈ ٹرمپ کو شدید تنقید کا نشانہ بنایا اور ٹویٹ میں کہا "تمہیں کولمبیا کے بارے میں کچھ بھی معلوم نہیں۔ تمہیں انسانیت سیکھنے کے لیے سو سال تنہائی نامی کتاب پڑھنی چاہیے۔ میں تمھاری طرح کاروبار میں نہیں آیا، میں منشیات ڈیلر نہیں اور نہ ہی کاروباری ہوں۔
میرے دل میں دولت کی کوئی ہوس نہیں، میں ایک سماجی کارکن ہوں اور انسانیت اور زندگی کا احترام کرتا ہوں، وہی زندگی جسے تمہارے تیل نے خطرے میں ڈال دیا ہے۔"
عالمی میڈیا کے مطابق گوستاوو پیٹرو نے مزید کہا کہ امریکا نے کیریبین میں ایک کارروائی کے دوران کولمبیا کے ایک ماہی گیر کو قتل کیا، حالانکہ امریکی حکام نے دعویٰ کیا تھا کہ وہ کشتی منشیات لے کر جا رہی تھی۔
اس پر امریکی صدر ٹرمپ نے کولمبیا کی امداد میں کٹوتی اور نئی محصولات عائد کرنے کی دھمکی دی۔ ٹرمپ کا کہنا تھا کہ کولمبیا منشیات کی پیداوار پر قابو پانے میں ناکام رہا، مگر پھر بھی امریکا سے امداد حاصل کر رہا ہے، اور اب وقت آ گیا ہے کہ یہ امداد روک دی جائے۔
یہ تنازع اُس وقت شروع ہوا جب ٹرمپ نے کولمبیا پر منشیات کی پیداوار میں ناکامی کا الزام عائد کیا اور صدر پیٹرو کو "غیر قانونی منشیات کا تاجر" قرار دیا۔
فی الحال کولمبیا امریکا سے ایک ارب ڈالر سے زیادہ کی امداد حاصل کر رہا ہے، تاہم ٹرمپ کے حالیہ بیان اور امداد میں ممکنہ کٹوتی کے بعد صورتحال مزید پیچیدہ ہو سکتی ہے۔ اس سے کولمبیا میں امداد پر انحصار کرنے والے منصوبوں پر منفی اثرات مرتب ہو سکتے ہیں اور دونوں ممالک کے تعلقات میں بگاڑ پیدا ہونے کا خطرہ ہے۔
کولمبیا کی حکومت اور امریکی انتظامیہ دونوں ہی اس معاملے پر مزید ردعمل دینے کے لیے تیار ہیں، اور یہ دیکھنا دلچسپ ہوگا کہ دونوں ممالک اس تنازعے کو کس طرح حل کرتے ہیں۔
