مون سون بارشوں کے دسویں اسپیل کا آغاز آج سے ہوگا۔ محکمہ موسمیات کے مطابق اسلام آباد اور پنجاب میں 7 سے 9 ستمبر تک بارشوں کا امکان ہے۔ پنجاب پہلے ہی سیلابی صورتحال سے دوچار ہے اور نئی بارشوں کی پیش گوئی کے باعث ندی نالوں میں طغیانی اور شہری سیلاب کا خدشہ ظاہر کیا گیا ہے۔
نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ اسلام آباد، راولپنڈی، مری، جہلم، چکوال، اٹک، منڈی بہاؤالدین، گجرات، گوجرانوالہ، حافظ آباد، چنیوٹ، لاہور، سیالکوٹ، نارووال، شیخوپورہ، فیصل آباد اور سرگودھا میں بارشوں کے نتیجے میں نشیبی علاقے زیرِ آب آ سکتے ہیں۔
این ڈی ایم اے کے مطابق پنجاب کے سیلاب سے متاثرہ اضلاع میں مزید خطرناک صورتحال پیدا ہونے کا امکان ہے اور عوام کو احتیاطی تدابیر اختیار کرنے کی ہدایت کی گئی ہے۔
وہیں کراچی میں اتوار سے منگل تک گرج چمک کے ساتھ تیز بارش کی پیش گوئی کی گئی ہے۔ شہر میں اربن فلڈنگ کا خدشہ ظاہر کیا گیا ہے۔
