امریکی ٹیکنالوجی کمپنی مائیکروسافٹ نے اعلان کیا ہے کہ اس نے فلسطینی شہریوں کی وسیع پیمانے پر نگرانی کے لیے استعمال ہونے والی اپنی ٹیکنالوجی تک اسرائیل کی رسائی روک دی ہے۔
کمپنی کے مطابق، اسرائیلی فوج کی ایک خفیہ انٹیلی جنس یونٹ کو مائیکروسافٹ کی کلاؤڈ سروسز سے بلاک کر دیا گیا کیونکہ وہ فلسطینیوں کے ڈیٹا کی نگرانی اور ٹریکنگ کے لیے اس پلیٹ فارم کا غلط استعمال کر رہی تھی۔
مائیکروسافٹ نے کہا کہ اسرائیلی یونٹ نے کمپنی کی اے آئی اور ڈیٹا سروسز کا ناجائز استعمال کیا، جو اس کے قوانین اور شرائط کی خلاف ورزی ہے۔
مائیکروسافٹ کے صدر اور نائب چیئر بریڈ اسمتھ کے مطابق، یہ فیصلہ برطانوی اخبار دی گارڈین کی ایک تحقیقی رپورٹ کے بعد کیا گیا۔
جس میں انکشاف ہوا تھا کہ اسرائیلی فوجی یونٹ 8200، مائیکروسافٹ کی Azure کلاؤڈ سروس کے ذریعے فلسطینیوں کے موبائل فون ریکارڈز اور ذاتی ڈیٹا تک رسائی حاصل کر رہی تھی۔
رپورٹ میں بتایا گیا کہ اس ٹیکنالوجی کے ذریعے اسرائیل فلسطینی شہریوں کے مقامات اور انفرادی معلومات اکٹھی کرکے انہیں اپنے مقاصد کے لیے استعمال کر رہا تھا۔
ماہرین کے مطابق یہ پہلا موقع ہے کہ کسی بڑی امریکی ٹیک کمپنی نے اسرائیلی فوج پر فلسطینی حقوق کی خلاف ورزی کے باعث اس نوعیت کی پابندی عائد کی ہے۔
مائیکروسافٹ کا یہ فیصلہ ملازمین اور سرمایہ کاروں کے بڑھتے ہوئے دباؤ کے بعد آیا ہے جو کمپنی کے اسرائیل کی فوجی کارروائیوں سے تعلقات پر تشویش رکھتے تھے۔
