عالمی ٹیکنالوجی کمپنی گوگل نے پنجاب میں ’گوگل کروم بُک‘ (لیپ ٹاپ) کی مقامی سطح پر تیاری کے لیے فیکٹری قائم کرنے کی پیشکش کی ہے، جس پر پنجاب حکومت نے منصوبے کے لیے مکمل معاونت کا یقین دلایا ہے۔
لاہور میں وزیراعلیٰ پنجاب مریم نواز سے ’گوگل فار ایجوکیشن‘ اور ’ٹیک ویلی‘ کے اعلیٰ سطح وفد نے ملاقات کی، جس کی قیادت گوگل فار ایجوکیشن کے گلوبل ڈائریکٹر کیون کالیس نے کی جبکہ ٹیک ویلی کے چیف انفارمیشن آفیسر عمر فاروق بھی اس موقع پر موجود تھے۔
ملاقات میں وفد نے صوبے میں کروم بک فیکٹری کے قیام کی تجویز پیش کی، جس پر وزیراعلیٰ پنجاب نے منصوبے کی مکمل حمایت کا اعلان کیا۔
اس موقع پر صوبے میں سرکاری اسکولوں میں ڈیجیٹل تعلیم کے فروغ اور ’اے آئی ٹولز‘ کے استعمال کے امکانات پر بھی تفصیلی تبادلہ خیال کیا گیا۔
وفد نے بتایا کہ نئی کروم بکس میں طلبہ کی سہولت کے لیے تین اہم سافٹ ویئرز انسٹال کیے جائیں گے، جن میں جیمنائی، ریڈ آلانگ اور کینوا شامل ہیں۔
اس کے علاوہ، گوگل فار ایجوکیشن نے اب تک دو ہزار سے زائد سرکاری اساتذہ کو تربیت فراہم کی ہے اور مزید اساتذہ کی ٹریننگ کا سلسلہ جاری ہے۔
وزیراعلیٰ مریم نواز نے کہا کہ پنجاب حکومت آئی ٹی کو بنیادی تعلیم کا حصہ بنانے پر کام کر رہی ہے۔ انہوں نے کہا کہ پنجاب کو آرٹیفیشل انٹیلی جنس کا حب بنانا انکی حکومت کا عزم ہے۔
انہوں نے مزید کہا کہ صوبائی حکومت گوگل کروم بک فیکٹری کے قیام میں تمام انتظامی و تکنیکی تعاون فراہم کرے گی تاکہ تعلیمی ٹیکنالوجی کی مقامی صنعت کو فروغ مل سکے۔
