پاکستان ٹی ٹوئنٹی ٹیم کے نائب کپتان شاداب خان کی ایشیا کپ 2025 میں شرکت مشکوک ہو گئی ہے، کیونکہ وہ کندھے کی انجری سے مکمل طور پر صحتیاب نہیں ہو سکے۔
آل راؤنڈر شاداب خان نے جولائی میں برطانیہ میں کندھے کا آپریشن کروایا تھا، جس کے باعث وہ بنگلادیش کے خلاف سیریز سے باہر رہے اور اب ویسٹ انڈیز کے دورے کے لیے بھی اسکواڈ کا حصہ نہیں ہیں۔
ایشیا کپ ٹی ٹوئنٹی 9 سے 28 ستمبر تک متحدہ عرب امارات میں ہوگا، جب کہ شاداب خان کو سرجری کے بعد مکمل صحت یابی کے لیے کم از کم 3 ماہ درکار ہیں ، اس طرح شاداب اکتوبر تک مکمل فٹ ہوں گے۔
پی سی بی نے قومی ٹیم کے نائب کپتان کی جگہ یا اس کے متبادل کے بارے میں تاحال کوئی اعلان نہیں کیا ہے۔
ایشیا کپ میں پاکستان اپنا پہلا میچ 12 ستمبر کو عمان کے خلاف کھیلے گا جب کہ 14 ستمبر کو پاک بھارت مقابلہ شیڈول ہے۔
