پاکستانی تفتیشی اداروں نے بھارت کی بدنام زمانہ خفیہ ایجنسی ‘را’ کا ایک بڑا نیٹ ورک پکڑ لیا ہے۔ ایڈیشنل آئی جی سی ٹی ڈی سندھ اور ڈی آئی جی نے کراچی میں پریس کانفرنس کرتے ہوئے بتایا کہ 18 مئی 2025 کو بدین کے ماتلی میں ایک شہری کا قتل ہوا، جو علاقے میں فلاحی کاموں کے حوالے سے جانے جاتے تھے۔
45 سالہ اس شہری کے قتل میں ملوث چار افراد کو 8 جولائی کو گرفتار کیا گیا، اور تفتیش کے دوران نیٹ ورک کا پتہ چلا۔
اے آئی جی آزاد خان کے مطابق، واقعے کی سی سی ٹی وی فوٹیج میں تین ملزمان کو دیکھا گیا، جبکہ عینی شاہدین نے بھی انہیں شناخت کیا۔
قتل کے الزام میں دو ملزمان کو گرفتار کیا گیا، جن کے قبضے سے واردات میں استعمال ہونے والا پستول اور موٹر سائیکل برآمد کی گئی۔
دوران تفتیش انکشاف ہوا کہ قتل کی منصوبہ بندی بھارتی ایجنٹ سنجے سنجیو کمار عرف فوجی نے کی، جو ایک خلیجی ریاست میں مقیم ہے۔
اس کے بعد سنجے نے شیخوپورہ کے رہائشی سلمان ورک کو ہائر کیا، جس نے محمد عمیر ورک نامی شہری سے رابطہ کیا جو اس پوری واردات کا کمانڈر تھا۔
عمیر نے شکیل احمد، محمد سجاد اور محمد عبید کے ذریعے رقم کی تقسیم کی۔
آزاد خان نے بتایا کہ گرفتار ملزمان سنجے کمار کے ساتھ رابطے میں تھے، اور بھارتی خفیہ تنظیم را نے علیحدگی پسند تنظیم کو بطور ہتھیار استعمال کیا۔
مزید برآں، دوران تفتیش یہ بھی سامنے آیا کہ محمد ارسلان ولد حبیب احمد نامی پاکستانی شہری نے خلیجی ریاست میں بھارتی ایجنٹ سنجے کمار سے ملاقات کی اور قتل کے لیے ہٹ ٹیم کو تمام مالی اور لوجسٹک معاونت فراہم کی۔
ایڈیشنل آئی جی سی ٹی ڈی آزاد خان نے بتایا کہ را نے اس واردات کے لیے خطیر رقم خرچ کی اور سنجے نے اس قتل کو بیرون ملک سے ہینڈل کیا، اس قتل پر بھارتی میڈیا نے جشن بھی منایا۔
انہوں نے بتایا کہ اس طرح کی دہشت گردی اسٹیٹ اسپانسرڈ دہشت گردی کہلاتی ہے، معاملہ ہر فورم پر اٹھائیں گے، گرفتار ملزمان سے تحقیقات جاری ہے اور مزید گرفتاریاں بھی متوقع ہیں۔
