کراچی میں شوہر نے ناجائز تعلقات پر ناراض بیوی کو تیزاب پلا دیا، 2 بچوں کی ماں دوران علاج ہسپتال میں دم توڑ گئی۔ پولیس کے مطابق کورنگی بلال کالونی میں خاتون کو شوہر نے مبینہ طور پر تیزاب پلا کر مار ڈالا، نور عائشہ نامی خاتون کو جمعرات کو تشویشناک حالت میں جناح اسپتال منتقل کیا گیا تھا۔
پولیس کے مطابق خاتون دورانِ علاج اسپتال میں دم توڑ گئی، مقتولہ کے شوہر ایوب اور دیور رفیق پر تیزاب پلانے کا الزام ہے۔
پولیس نے مقتولہ کے والد علی اکبر کی مدعیت میں تعزیرات پاکستان کی دفعہ 302 کے تحت مقدمہ درج کرکے تفتیش شروع کردی۔
مقتولہ کے والد نے بتایا کہ بیٹی کی شادی 7 سال قبل ایوب نامی شخص سے ہوئی تھی، نور عائشہ کی دو کمسن بیٹیاں بھی ہیں۔
مدعی مقدمہ نے الزام عائد کیا ہے کہ بیٹی کو تیزاب پلایا گیا اور مارا پیٹا گیا، داماد کے ناجائز تعلقات پر اکثر جھگڑے ہوتے تھے، بیٹی اکثر ناراض ہو کر میکے آ جاتی تھی۔
مدعی مقدمہ نے بتایا کہ 4 جولائی کو اطلاع ملی، بیٹی کو ہسپتال لے جایا گیا، بیٹی نے اسپتال میں دم توڑ دیا، پولیس کے مطابق ابتدائی تفتیش میں تیزاب پلانے کے شواہد ملے ہیں۔
