وزیراعظم نواز شریف عطاءآباد کے علاقے میں تین روز بعد پاک چین دوستی سرنگوں کے سلسلے کا افتتاح کریں گے۔
ذرائع کے مطابق پاک چین دوستی ٹنلز کا افتتاح 14 ستمبر کووزیراعظم نواز شریف کے ہاتھوں ہوگا۔
پاک چین دوستی ٹنل 24 کلومیٹر پر مشتمل ہے اور قراقرم ہائی وے کا ہی ایک حصہ ہے، اس میں 5 سرنگیں جن کی کل لمبائی 7 کلومیٹر ہے جبکہ 2 پل اور 78 پلیائیں شامل ہیں۔
سال 2010 میں ایک بڑے لینڈ سلائیڈ کے نتیجے میں دریائے ہنزہ کے بہاوٗ کا راستہ بند ہوگیا تھا اور عطاء آباد جھیل وجود میں آئی تھی، اسی لینڈ سلائیڈ کے نتیجے میں پاک چین دوستی ٹنلز کا بڑا حصہ متاثر ہوا تھا۔
مذکورہ منصوبے کو 3 سال کے عرصے میں 275 ملین امریکی ڈالر خرچ کر کے مکمل کیا گیا ہے اور اس کی تکمیل سے وادیٗ گوجل کا رابطہ باقی ماندہ گلگت بلتستان سے استوار ہو جائے گا۔
