ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان نے دہشت گردی اور خوارج کے خلاف مؤثر اقدامات کیے ہیں اور دشمن کی کسی بھی جارحیت کے خلاف پاک فوج اور عوام سیسہ پلائی دیوار ثابت ہوں گے۔ لیفٹیننٹ جنرل احمد شریف چوہدری نے مردان کی مختلف یونیورسٹیوں اور مدارس کے اساتذہ و طلبہ کے ساتھ نشست کے دوران ملکی سلامتی، معرکہ حق، حالیہ پاک افغان کشیدگی اور سیکیورٹی صورتحال پر تبادلہ خیال کیا۔
اس موقع پر عبد الولی خان یونیورسٹی، وومن یونیورسٹی، یونیورسٹی آف انجینئرنگ اینڈ ٹیکنالوجی اور مدارس کے طلبہ و اساتذہ شریک ہوئے۔
ڈی جی آئی ایس پی آر نے کہا کہ پاک فوج نے دہشت گردی اور ملک دشمن عناصر کے خلاف بھرپور اقدامات کیے ہیں اور ہر خطرے کا مقابلہ کرنے کے لیے پوری طرح تیار ہے۔
طلبہ و اساتذہ نے غازیان اور شہداء کو خراج تحسین پیش کیا اور کہا کہ ڈی جی آئی ایس پی آر کی گفتگو سے پاک افواج کے کردار اور قربانیوں کے بارے میں ابہام دور ہوئے۔
اساتذہ نے واضح کیا کہ قوم پاک فوج کی کاوشوں کو قدر کی نگاہ سے دیکھتی ہے اور ملک کی ترقی و امن میں ان کے کردار کو سراہتی ہے۔
طلبہ نے کہا کہ ملکی سلامتی اور استحکام کے لیے خیبر پختونخوا کے نوجوان افواج پاکستان کے شانہ بشانہ کھڑے ہیں اور یہ سمجھنا ضروری ہے کہ کس طرح ملک دشمن عناصر سوشل میڈیا پر پروپیگنڈا کرتے ہیں۔
انہوں نے مزید کہا کہ افواج پاکستان کی قربانیوں کے پیش نظر اب یہ ہماری ذمہ داری ہے کہ ہم اپنی افواج کے شانہ بشانہ کھڑے ہوں۔
