ڈی جی آئی ایس پی آر لیفٹیننٹ جنرل احمد شریف چوہدری نے ایک بار پھر خبردار کرتے ہوئے کہا کہ پاک فوج دفاع وطن کے لیے ہر لمحہ تیار ہے اور کسی بھی بیرونی جارحیت کا جواب سخت اور مؤثر ہوگا۔ ایبٹ آباد میں مختلف جامعات کے اساتذہ اور طلبہ کے ساتھ نشست کے دوران ڈی جی آئی ایس پی آر نے ملکی سکیورٹی، پاک افغان کشیدگی اور معرکہ حق کے اہم پہلوؤں پر تفصیل سے بات کی۔
اس موقع پر ترجمان پاک فوج بھی موجود تھے، اور نشست میں بڑی تعداد میں اساتذہ و طلبہ نے حصہ لیا۔
ڈی جی آئی ایس پی آر نے کہا کہ پاکستان نے دہشت گردی اور فتنۃ الخوارج کے خلاف مؤثر اقدامات کیے ہیں، اور اساتذہ و طلبہ نے شہداء اور غازیان کو خراج تحسین پیش کیا۔
وائس چانسلر ہزارہ یونیورسٹی ڈاکٹر اکرام اللہ خان نے کہا کہ وطن سے محبت کی حقیقی مثال پاک فوج ہے، جو ہمیشہ محاذِ اول پر کھڑی رہتی ہے، اور ہم اس کے ساتھ کھڑے ہیں۔
اساتذہ نے اس موقع پر یہ بھی واضح کیا کہ دشمن عناصر کی سرگرمیاں بچوں کے ذہنوں کو گمراہ کرنے کے لیے بڑھ گئی ہیں، اس لیے ضروری ہے کہ نوجوانوں کو درست اور مصدقہ معلومات فراہم کی جائیں۔
طلبہ کا کہنا تھا کہ ہمیں فخر ہے کہ ہم اس ملک کے شہری ہیں جہاں افواجِ پاکستان جیسے ادارے نوجوانوں کو حوصلہ اور رہنمائی فراہم کرتے ہیں، آج ہمیں سوشل میڈیا پر پاک فوج کے خلاف پھیلائی جانے والی غلط افواہوں کے بارے میں درست معلومات حاصل ہوئیں۔
اس موقع پر طلبہ نے مزید کہا ہے کہ ڈی جی آئی ایس پی آر کے جوابات نے ہمارے ذہنوں سے ملکی اور صوبائی حالات سمیت افواج پاکستان کے حوالے سے ابہام دور کیے۔
