یوم استحصال کشمیر پر مسلح افواج کی قیادت کامقبوضہ کشمیر کے غیور عوام کے ساتھ اظہار یکجہتی ، آئی ایس پی آر کے مطابق مسلح افواج کشمیریوں کی سیاسی، اخلاقی اور انسانی بنیاد پر حمایت جاری رکھے گی۔
آئی ایس پی آر کی جانب سے جاری بیان کے مطابق فیلڈ مارشل جنرل سید عاصم منیر ، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، سروسز چیفس اور مسلح افواج نے یوم استحصال کشمیر کے موقع پر خصوصی پیغام دیا ہے۔
مسلح افواج کی قیادت کا کہنا ہے کہ کشمیریوں کی حق خود ارادیت کی جائز اور طویل جدوجہد کی مکمل حمایت کرتے ہیں۔
بھارتی فورسز کی عالمی قوانین اور انسانی حقوق کی مسلسل خلاف ورزیاں قابل مذمت ہیں، بھارت کا ریاستی جبر اور انسانی بحرانوں کو ہوا دینا ،علاقائی استحکام کیلئے مستقل خطرہ ہے۔
آئی ایس پی آر کا مزید کہنا ہے کہ خطے کا پائیدار امن یو این قراردادوں اور کشمیریوں کی امنگوں کے مطابق تنازع کے حل میں ہے۔
مسلح افواج مقبوضہ کشمیر کے شہدا کو غیرمعمولی قربانیوں پر خراج تحسین پیش کرتی ہے۔
