پاکستانی اداکار زاہد احمد نے سوشل میڈیا پر اپنے متنازع بیان کے حوالے سے وضاحت دی ہے اور کہا کہ ان کے الفاظ کو غلط طور پر سمجھا گیا۔ حال ہی میں ایک پوڈکاسٹ میں زاہد احمد کے ایک بیان نے ہنگامہ برپا کر دیا تھا، جس میں انہوں نے سوشل میڈیا اور ڈیجیٹل کریئیٹرز کے حوالے سے سخت الفاظ استعمال کیے تھے۔
بعد ازاں زاہد احمد نے انسٹاگرام پر ایک وضاحتی ویڈیو جاری کی، جس میں انہوں نے کہا کہ ان کے بیان کا اصل مقصد غلط سمجھا گیا۔
انہوں نے کہا "میں پوڈکاسٹ میں سوشل میڈیا بنانے والوں کے بارے میں بات کر رہا تھا، ڈیجیٹل کریئیٹرز کے بارے میں نہیں۔
میں نے 'جہنمی' لفظ استعمال کیا جو میری غلطی تھی۔ مجھے افسوس ہے، کیونکہ میں نے جذبات میں آ کر بات کی۔ مجھے کسی کے جنت یا جہنم کا فیصلہ کرنے کا حق نہیں۔"
زاہد احمد نے مزید کہا: "یہ اللہ کا کام ہے۔ میں اپنی بات درست کرنا چاہتا ہوں کیونکہ بہت سے نوجوان مجھ سے متاثر ہوتے ہیں اور میں دین سے متعلق کوئی غلط پیغام نہیں دینا چاہتا۔"
اداکار کی اس وضاحت پر سوشل میڈیا پر ملا جلا ردِعمل سامنے آیا ہے، کئی صارفین نے زاہد احمد کی تعریف کرتے ہوئے کہا کہ اپنی غلطی تسلیم کرنا ایک بہادرانہ عمل ہے اور انہوں نے عاجزی دکھا کر اپنی عظمت ثابت کی۔
دوسری جانب کچھ صارفین نے طنز کرتے ہوئے کہا کہ زاہد احمد کا سافٹ ویئر اپڈیٹ ہوگیا ہے، یعنی انہوں نے عوامی ردعمل کے بعد بات بدل لی۔
