جوئے کی ایپلی کیشنز کی سوشل میڈیا پر تشہیر کے کیس میں عدالت نے یوٹیوبر سعد الرحمان المعروف ڈکی بھائی کی اہلیہ، عروب جتوئی، کی عبوری ضمانت میں مزید توسیع کر دی۔ ایڈیشنل ڈسٹرکٹ اینڈ سیشن جج ڈاکٹر ساجدہ چوہدری نے عروب جتوئی کی ضمانت کی مدت مکمل ہونے پر ان کی عدالت میں پیشی کے موقع پر کیس کی سماعت کی۔
عدالت نے عبوری ضمانت میں 6 نومبر تک توسیع کرتے ہوئے تفتیشی افسر کو ہدایت دی کہ آئندہ سماعت پر کیس سے متعلق تفصیلی رپورٹ جمع کرائی جائے۔
واضح رہے کہ ڈکی بھائی 20 اگست سے نیشنل سائبر کرائم انویسٹی گیشن ایجنسی کی تحویل میں ہیں۔ ایجنسی نے ڈکی بھائی، ان کی اہلیہ عروب جتوئی اور دیگر افراد کے خلاف مقدمہ درج کیا تھا۔
تفتیشی رپورٹ کے مطابق، ملزمان مبینہ طور پر ایک بین الاقوامی جوئے کے نیٹ ورک سے وابستہ ہیں اور بھاری معاوضے کے عوض سوشل میڈیا پلیٹ فارمز پر غیر قانونی جوئے کی ایپلی کیشنز کی تشہیر کر رہے تھے۔
ڈکی بھائی اس وقت عدالتی ریمانڈ پر جیل میں ہیں، جبکہ ان کی بعد از گرفتاری ضمانت کی درخواستیں جوڈیشل مجسٹریٹ اور سیشن کورٹ دونوں نے مسترد کر دی تھیں۔
گزشتہ ہفتے این سی سی آئی اے نے اسی کیس میں ڈکی بھائی، ان کی اہلیہ عروب جتوئی، اور ان کے منیجر سبحان کے خلاف چالان ڈسٹرکٹ کورٹ میں جمع کرایا، جنہیں مقدمے میں مرکزی ملزمان قرار دیا گیا ہے۔
چالان کے مطابق ڈکی بھائی نے جسمانی ریمانڈ کے دوران آن لائن جوئے کو فروغ دینے میں ملوث ہونے کا اعتراف کیا۔
تحقیقات میں یہ بھی انکشاف ہوا کہ جوئے کی تشہیر سے انہوں نے کروڑوں روپے کمائے، جب کہ ان کے دو بینک اکاؤنٹس سے 21 کروڑ روپے برآمد ہوئے۔
چالان میں مزید بتایا گیا کہ عروب جتوئی بھی جوئے کی تشہیر کی سرگرمیوں میں ملوث تھیں۔
