پاکستانی میوزک انڈسٹری سے وابستہ معروف گلوکارائیں میشا شفیع اور عروج آفتاب نے عالمی سطح پر اپنی شناخت مزید مضبوط بنانے کے لیے اہم قدم اٹھایا ہے۔ دونوں فنکاراؤں نے گریمی ایوارڈز کی نامزدگیوں کے لیے اپنے نئے البمز اور گانے انفرادی طور پر جمع کروا دیے ہیں۔
میشا شفیع نے اپنا پہلا سولو البم "کھلنے کو" تین کیٹیگریز بیسٹ گلوبل میوزک البم، بیسٹ گلوبل میوزک پرفارمنس، اور بیسٹ انجینئرڈ البم (نان کلاسیکل) — کے لیے پیش کیا ہے۔
47 منٹ کے اس البم میں 11 گانے شامل ہیں جو ان کے موسیقی کیریئر کا نیا باب ثابت ہو رہے ہیں۔
البم میں ہنٹنگ ساؤنڈ سکیپس، خود شناسی پر مبنی شاعری، اور گہرے جذبات سے لبریز دھنیں شامل ہیں۔
دوسری جانب گریمی یافتہ گلوکارہ عروج آفتاب نے بہترین ریمکسڈ ریکارڈنگ کیٹیگری کے لیے اپریل میں ریلیز ہونے والا ’رات کی رانی‘ کا ریمکس ورژن ’خرانگ بن‘ جمع کروایا ہے۔
