پاکستانی ڈرامہ انڈسٹری کے معروف اداکار منیب بٹ نے اپنی بیٹیوں کو زندگی کا سب سے بڑا تحفہ قرار دیتے ہوئے کہا ہے کہ ہر بیٹی نے ان کی زندگی میں خوشیاں اور کامیابیاں بڑھائیں۔ منیب بٹ اپنی شاندار اداکاری کے ساتھ ساتھ اپنے خاندان کے ساتھ محبت بھری تصویروں اور ویڈیوز کی وجہ سے بھی مداحوں کے دلوں میں خاص مقام رکھتے ہیں۔
ان کی اہلیہ، معروف اداکارہ ایمن خان، پاکستان کی سب سے زیادہ فالو کی جانے والی سیلیبریٹیز میں شامل ہیں۔ اس جوڑے کی تین پیاری بیٹیاں ہیں: امل، میرال اور نیمل۔
حال ہی میں زارا نور عباس کے پوڈ کاسٹ میں گفتگو کرتے ہوئے منیب بٹ نے انکشاف کیا کہ جب سے وہ بیٹیوں کے والد بنے ہیں۔
ان کی زندگی میں بے پناہ خوشیاں آئی ہیں۔ ہر بیٹی کی آمد نے ان کی دنیا کو مزید روشن اور خوشیوں سے بھر دیا۔
منیب بٹ نے مسکراتے ہوئے کہا کہ جس سال ان کے گھر بیٹی پیدا ہوئی، اللہ نے ان کے رزق اور کامیابیوں میں اضافہ کیا۔ ہر نئی بیٹی کے ساتھ ان کے کیریئر میں بھی نئے مواقع اور اہم کامیابیاں آئیں۔
انہوں نے بتایا کہ ان کے اہم کیریئر سنگ میل، کامیاب ڈرامے، نئے پروجیکٹس اور مالی ترقی ہمیشہ انہی ادوار میں آئی جب ان کی بیٹیاں پیدا ہوئیں۔
انہوں نے کہا کہ ان کی سب سے چھوٹی بیٹی نیمل بٹ کی پیدائش کے بعد بھی زندگی میں خوشیوں اور برکتوں کی ایک نئی لہر آئی ہے۔
منیب بٹ کے مطابق، بیٹیاں واقعی اللہ کی رحمت ہیں اور ان کے آنے سے گھر میں محبت، سکون اور کامیابی سب بڑھ جاتے ہیں۔
سوشل میڈیا پر مداحوں نے بھی ان کے اس جذبے کو بے حد سراہا اور کئی صارفین نے لکھا کہ“ایسے والد ہی اصل ہیرو ہوتے ہیں جو بیٹیوں کو نعمت سمجھتے ہیں۔“
