پاکستانی اداکار ارباز خان نے ماضی کی معروف فلمی اداکارہ خوشبو خان کے ساتھ اپنی طلاق کی تصدیق کر دی ہے۔
حال ہی میں ایک شو میں شرکت کے دوران ارباز خان نے مختلف موضوعات پر بات کرتے ہوئے اپنی طلاق کے حوالے سے وضاحت دی۔
انہوں نے کہا کہ اس وقت وہ سنگل ہیں اور اپنے دل میں کسی کے لیے جگہ نہیں رکھتے۔ مزید بتایا کہ زندگی کے تجربات نے انہیں مضبوط اور پختہ بنایا ہے اور وہ اس مرحلے سے آگے بڑھ چکے ہیں۔
ارباز خان نے کہا کہ ہر دن ایک نیا سبق سکھاتا ہے اور اب وہ اس مقام پر پہنچ چکے ہیں جہاں فوری تعلقات کی ضرورت محسوس نہیں ہوتی۔
اپنی موجودہ زندگی کے بارے میں بات کرتے ہوئے انہوں نے کہا کہ وہ سنگل زندگی کا لطف اٹھا رہے ہیں کیونکہ تعلقات اکثر ذمہ داریوں اور چیلنجز کے ساتھ آتے ہیں۔
جو کبھی کبھار انسان کے لیے بوجھ بن سکتے ہیں اور زندگی کو مشکل بنا کر کسی بھی انسان کوتباہ کر سکتے ہیں۔
اداکار کی سابقہ اہلیہ، اداکارہ خوشبو خان پہلے ہی اپنی طلاق کی تصدیق کر چکی ہیں۔
انہوں نے ایک انٹرویو میں بتایا کہ ارباز خان پانچ سال قبل بغیر کسی اطلاع کے گھر چھوڑ کر چلے گئے تھے اوراس کے بعد کبھی واپس نہیں آئے۔
انہوں نے کہا کہ اس دوران وہ اپنے دونوں بیٹوں کی پرورش اکیلے کر رہی ہیں اور ان کے ساتھ زندگی گزار رہی ہیں۔
خیال رہے کہ خوشبو اور ارباز خان نے 2000 میں شادی کی تھی اور ان کے دو بیٹے ہیں۔
