سوشل میڈیا پر اپنی منفرد اور دلکش گائیکی کے ذریعے شہرت حاصل کرنے والے معروف گلوکار و انٹرٹینر چاہت فتح علی خان نے حال ہی میں ایک وضاحتی بیان جاری کیا ہے۔
اس بیان میں انہوں نے خود پر انڈے پھینکے جانے کے واقعے پر ردعمل دیتے ہوئے اپنے مداحوں اور میڈیا نمائندگان کا شکریہ ادا کیا، جنہوں نے اس افسوسناک واقعے پر ان کے ساتھ ہمدردی کا اظہار کیا۔
گزشتہ دنوں سوشل میڈیا پر ایک ویڈیو وائرل ہوئی جس میں دیکھا جا سکتا ہے کہ خان صاحب برطانیہ میں سڑک کنارے ایک پروموشنل ویڈیو ریکارڈ کروا رہے تھے کہ اچانک چند نوجوان آئے اور ان کے سر پر انڈے پھینک کر فرار ہوگئے۔
اس موقع پر میڈیا نمائندگان اور دیگر مہمان بھی موجود تھے، جنہوں نے پورے واقعے کو کیمرے میں محفوظ کر لیا۔
واقعے کے فوراً بعد خان صاحب کچھ دیر کے لیے سکتے میں آگئے، لیکن جلد ہی خود کو سنبھال لیا۔
اب خان صاحب نے ایک نئی ویڈیو جاری کی ہے جس میں کہا: "میں اپنے تمام چاہنے والوں اور میڈیا کا شکریہ ادا کرتا ہوں جنہوں نے اس واقعے پر افسوس کا اظہار کیا اور اس کی کوریج کی۔"
انہوں نے مزید انکشاف کیا کہ یہ واقعہ حالیہ نہیں بلکہ تین ماہ قبل، 19 جون کو پیش آیا تھا۔
واقعے کے بعد دو سے تین ہفتوں تک انہیں مختلف نمبروں سے کالز موصول ہوتی رہیں، جن میں انہیں ڈرایا دھمکایا گیا اور طنزیہ انداز میں پوچھا جاتا رہا: "بدو بدی، چوٹ زیادہ تو نہیں لگی؟"
چاہت فتح علی خان نے کہا: "میرے پاس یہ سارے نمبرز محفوظ ہیں، جنہیں میں پولیس کے حوالے کروں گا، تاکہ یہ افراد جان سکیں کہ انہوں نے میرے ساتھ کیا کیا ہے۔"
یہ بات قابل ذکر ہے کہ دنیا بھر میں معروف شخصیات، سیاستدانوں اور عوامی نمائندوں کے ساتھ انڈے پھینکے جانے کے واقعات اکثر پیش آتے رہے ہیں۔
اکثر اوقات ایسے واقعات کو احتجاج یا ناپسندیدگی کے اظہار کے طور پر استعمال کیا جاتا ہے، تاہم کسی بھی شخص کی تضحیک کسی طور قابلِ تحسین عمل نہیں سمجھی جاتی۔
سوشل میڈیا پر اس ویڈیو کے وائرل ہونے کے بعد صارفین کی بڑی تعداد نے اس حرکت کو شرمناک، غیر اخلاقی اور بچگانہ حرکت قرار دیا ہے۔
