نشو بیگم کا وحید مراد سے متعلق انوکھا انکشاف

ان کا کہنا تھا کہ وحید مراد پاک و ہند کے وہ ہیرو تھے جو آج بھی بے حد مقبول ہیں، ان کے چاہنے والے آج بھی موجود ہیں اور ان سے محبت کرتے ہیں۔

نشو بیگم کے مطابق وحید مراد ایک بڑے برانڈ کی حیثیت رکھتے تھے، ان کا اسٹائل منفرد تھا، بڑی بڑی آنکھیں، لباس پہننے کا انداز اور بولنے کا طریقہ سب ہی دلکش تھا۔ وہ جب کبھی کسی لڑکی کی آنکھوں میں دیکھتے تو وہ ضرور متاثر ہو جاتی تھی۔

انہوں نے بتایا کہ ایک مرتبہ فلم کی شوٹنگ کے دوران جب وہ خراب موڈ میں سیٹ پر آئیں تو وحید مراد نے ان کا دوپٹہ اوڑھ کر ان کی نقل اتاری اور ہنسنے پر مجبور کر دیا۔

نشو بیگم کا کہنا تھا کہ پرانے زمانے کے اداکار صرف کام تک محدود نہیں رہتے تھے بلکہ ماحول کو خوشگوار بنانے اور بہترین پرفارمنس دینے کی کوشش کرتے تھے۔

اداکارہ نے مزید بتایا کہ وحید مراد سیٹ پر اکثر شرارتیں کرتے، کبھی کھانا چھپا دیتے، کبھی وگ کے ساتھ مذاق کرتے، جس پر وہ رل بھی پڑتیں، لیکن سب کو ان کی یہ شرارتیں بہت مزے دیتی تھیں۔

نشو بیگم نے کہا کہ ایک موقع پر انہوں نے اسپاٹ بوائے وحید کو ڈانٹ کر وحید مراد سے مزاق کا بدلہ لینے کی کوشش بھی کی۔

اگلے دن وحید مراد ایک لڑکی کو سیٹ پر لے آئے جس کا نام بھی نشو تھا اور سب کے سامنے اس لڑکی کو ڈانٹنا شروع کردیا، یہاں تک کہ وہ رونے لگ گئیں، اس پر وحید مراد نے کہا کہ اب اصل بدلہ پورا ہوا۔

انہوں نے کہا کہ وحید مراد کی یہی شرارتیں کبھی انہیں تنگ کرتیں اور کبھی ہنسنے پر مجبور کردیتی تھیں، کئی بار وہ یہ بھی سوچتیں کہ دوبارہ ان کے ساتھ کام نہیں کریں گی لیکن وحید مراد ہمیشہ انہیں راضی کرلیا کرتے تھے۔

خیال رہے کہ وحید مراد کو پاکستان فلم انڈسٹری کا چاکلیٹی ہیرو کہا جاتا ہے، ساٹھ اور ستر کی دہائی میں ان کی فلمیں سپرہٹ ہوئیں اور وہ نوجوانوں کے اسٹائل آئیکون بن گئے۔

ان کی مقبولیت کا یہ عالم تھا کہ مرد و خواتین سب ان کے فیشن، بات کرنے کے انداز اور شخصیت کی نقل کرتے تھے۔

آج بھی وہ پاکستان کے سب سے زیادہ پسند کیے جانے والے اداکاروں میں شمار ہوتے ہیں، ان کا انتقال 1983 میں کراچی میں ہوا۔