پاکستانی ڈرامہ و فلموں کے معروف اداکار اسد ملک نے حال ہی میں ایک مارننگ شو میں شرکت کی، جہاں انہوں نے اپنی ذاتی زندگی، شادی سے متعلق خیالات اور والد کے ساتھ گزرے قریبی رشتے پر کھل کر گفتگو کی۔
انہوں نے بتایا کہ جب وہ صرف 20 برس کے تھے تو والدہ کا انتقال ہوگیا، جو ان کے لیے نہایت کڑا وقت تھا۔
اس مشکل گھڑی میں والد نے ماں اور باپ دونوں کا کردار ادا کیا۔ دفتر سے واپس آ کر کھانا پکانا اور بیٹے کو کھلانا ان کی روزمرہ کا حصہ بن گیا۔
جس نے اسد کے دل میں والد کے لیے بے حد احترام اور محبت پیدا کی۔
اداکار نے یہ بھی بتایا کہ ان کی والدہ سخت مزاج تھیں، اسی لیے زیادہ قربت والد کے ساتھ رہی۔
بیوی کی وفات کے بعد والد نے کئی برس تنہا زندگی گزاری، لیکن ان کی تنہائی دیکھ کر اسد نے ہی ان کی دوسری شادی کروائی تاکہ وہ زندگی کو دوبارہ خوشی کے ساتھ گزار سکیں۔
تاہم والد کے انتقال کے وقت ان کے پاس موجود نہ ہونے کا دکھ ہمیشہ ان کے دل میں رہے گا۔ اسد نے کہا: “کاش میں والد کو آخری بار گلے لگا پاتا، یہ لمحہ ہمیشہ یاد رہے گا۔”
شادی کے حوالے سے گفتگو کرتے ہوئے اسد ملک نے دعویٰ کیا کہ اب تک کسی سے محبت نہیں ہوئی، اسی وجہ سے اس موضوع پر زیادہ بات نہیں کرسکتے۔
ان کا کہنا تھا کہ اگر کبھی محبت ہوگی تو وہ اس بارے میں ضرور بات کریں گے۔
انہوں نے واضح کیا کہ شادی کا شوق انہیں بالکل نہیں۔ ان کے مطابق شادی کے بغیر بھی زندگی گزاری جا سکتی ہے کیونکہ شادی صرف رفاقت کا نام نہیں بلکہ یہ ایک بڑی ذمہ داری ہے جس کے لیے وقت اور قربانی درکار ہوتی ہے۔
اسد ملک کا کہنا تھا کہ شادی کا مطلب ہے کسی کی بیٹی کو گھر لانے کے بعد اس کے تمام حقوق اور ضروریات پوری کرنا، لیکن فی الحال وہ خود کو اس کے لیے تیار نہیں سمجھتے۔
البتہ انہوں نے یہ اعتراف کیا کہ بچوں کو بے حد پسند کرتے ہیں، مگر پھر بھی شادی کا ارادہ نہیں رکھتے۔
