برطانیہ، آسٹریلیا اور کینیڈا کی جانب سے فلسطین کو تسلیم کرنے کے فیصلے پر امریکا کا ردِعمل سامنے آ گیا۔ امریکی محکمہ خارجہ نے اپنے بیان میں کہا ہے کہ برطانیہ، آسٹریلیا، کینیڈا اور دیگر ممالک کی جانب سے فلسطینی ریاست کو تسلیم کرنا محض نمائشی اقدام ہے۔ ترجمان کے مطابق ہماری ترجیح سنجیدہ سفارت کاری ہے، نمائشی اعلانات نہیں۔
امریکی محکمہ خارجہ نے واضح کیا کہ خطے میں امن، اسرائیل کی سلامتی اور یرغمالیوں کی رہائی اولین ترجیحات ہیں اور پائیدار امن صرف حماس کے بغیر ممکن ہے۔
دوسری جانب فلسطینی وزارتِ خارجہ نے برطانیہ، کینیڈا اور آسٹریلیا کے فیصلے کو بہادرانہ اقدام قرار دیتے ہوئے کہا کہ فلسطینی ریاست کو تسلیم کرنا بین الاقوامی قانون کے عین مطابق ہے۔
برطانیہ، کینیڈا اور آسٹریلیا کا اقدام دو ریاستی حل کو بچانےمیں مددگار ثابت ہوگا،امریکا جیسے بڑے ممالک کو بھی فلسطین کو تسلیم کرنا چاہیے۔
