برطانیہ کے علاقے کیمبرج شائر میں ٹرین میں تیز دھار آلے سے کیے گئے حملے کے نتیجے میں 10 مسافر زخمی ہو گئے، جن میں سے 9 کی حالت تشویشناک بتائی جا رہی ہے۔ پولیس کے مطابق یہ افسوسناک واقعہ ڈانکاسٹر سے لندن کنگز کراس جانے والی ٹرین میں پیش آیا، جو مقامی وقت کے مطابق شام 6 بج کر 25 منٹ پر روانہ ہوئی تھی۔
واقعے کے فوراً بعد پولیس نے ہنٹنگڈن اسٹیشن پر کارروائی کرتے ہوئے 2 مشتبہ افراد کو گرفتار کر لیا۔
زخمیوں کو فوری طور پر قریبی اسپتالوں میں منتقل کر دیا گیا، جبکہ متعدد مسافروں کو لندن جانے والی بسوں کے ذریعے منزل تک پہنچایا گیا۔
کیمبرج شائر پولیس نے اس واقعے کو “بڑا حادثہ” قرار دیتے ہوئے بتایا کہ انسدادِ دہشت گردی کے ماہر افسران تحقیقات میں معاونت کر رہے ہیں۔
ایک عینی شاہد کے مطابق، اس نے ایک شخص کو دیکھا جو خون آلود بازو کے ساتھ بوگی میں بھاگ رہا تھا اور چیخ رہا تھا “ان کے پاس چاقو ہے، بھاگو!” — اس کے فوراً بعد ایک اور شخص زمین پر گرا ہوا دکھائی دیا۔
برطانوی نشریاتی ادارے کے مطابق، حملے میں زخمی ہونے والے 10 میں سے 9 افراد کی حالت تشویشناک ہے، اور پولیس واقعے کی وجوہات جاننے کی کوشش کر رہی ہے۔
پولیس اور ریسکیو ٹیموں نے موقع پر پہنچ کر زخمیوں کو قریبی اسپتال منتقل کیا۔
وزیراعظم کیئر اسٹارمر نے اس خوفناک اور افسوسناک واقعے پر گہری تشویش کا اظہار کرتے ہوئے کہا کہ یہ واقعہ انتہائی پریشان کن ہے۔
انہوں نے عوام سے اپیل کی کہ وہ مقامی حکام کی ہدایات پر عمل کریں اور افواہوں سے گریز کریں۔
پولیس نے کہا ہے کہ واقعے کی تحقیقات جاری ہیں، تاہم ابھی تک حملے کی وجوہات کے بارے میں کوئی حتمی بیان جاری نہیں کیا گیا۔
