برطانیہ، کینیڈا اور آسٹریلیا کے بعد پرتگال نے بھی فلسطین کو باضابطہ طور پر خودمختار ریاست تسلیم کرنے کا اعلان کیا۔ نیویارک میں صحافیوں سے گفتگو کرتے ہوئے پرتگالی وزیر خارجہ نے کہا کہ فلسطین کو ریاست تسلیم کرنا پرتگال کی خارجہ پالیسی کا مستقل اور بنیادی مؤقف ہے۔
پرتگالی وزیر خارجہ پاولو رینجل نے واضح کیا کہ دو ریاستی حل ہی مشرقِ وسطیٰ میں پائیدار اور دیرپا امن کی ضمانت ہے۔
انہوں نے اعتراف کیا کہ فلسطینی ریاست کا اعتراف غزہ میں جاری انسانی بحران کو ختم نہیں کرتا، لیکن فوری جنگ بندی ناگزیر ہے۔
خیال رہے کہ اس سے قبل برطانیہ، کینیڈا اور آسٹریلیا بھی فلسطین کو باضابطہ طور پر ریاست تسلیم کرنے کا اعلان کر چکے ہیں۔
برطانوی وزیراعظم کیئر اسٹارمر نے سوشل میڈیا پیغام میں فلسطین کو تسلیم کرنے کا باضابطہ اعلان کیا۔
کینیڈین وزیراعظم مارک کارنی نے بھی کہا کہ کینیڈا فلسطین کو تسلیم کرتا ہے اور اس کے پرامن مستقبل کی تعمیر میں کردار ادا کرے گا۔
آسٹریلوی حکومت نے بھی فلسطین کو بطور ریاست تسلیم کرنے کا اعلان کرتے ہوئے کہا ہے کہ فلسطینی ریاست کو تسلیم کرنا دوریاستی حل کی بین الاقوامی کوششوں کا حصہ ہے۔
آسٹریلوی حکومت کا کہنا ہے کہ فلسطینی اتھارٹی کی جانب سے کروائی گئی یقین دہانیوں پر عمل ہونے کے بعد فلسطین کے ساتھ سفارتی تعلقات قائم کرنے اور سفارتخانے کھولنے جیسے اقدامات پر غور کیا جائے گا۔
