جنگ عظیم دوم میں جاپان کی شکست کی 80 ویں سالگرہ کے موقع پر چین میں قومی تاریخ کی سب سے بڑی اور شاندار فوجی پریڈ منعقد کی گئی۔ تیانمن اسکوائر پر ہونے والی اس تاریخی تقریب میں وزیراعظم شہباز شریف نے شرکت کی، جبکہ روسی صدر ولادیمیر پیوٹن، شمالی کوریا کے رہنما اور ایران کے صدر مسعود پزشکیان سمیت مختلف ممالک کے اعلیٰ نمائندے بھی موجود تھے۔
اس تقریب میں بھارت کے وزیراعظم نریندر مودی کو شرکت کی دعوت نہیں دی گئی تھی۔
چین کے صدر شی جن پنگ نے مہمانوں کا استقبال کیا اور پریڈ سے خطاب میں کہا کہ دنیا اس وقت امن یا جنگ کے فیصلے کے اہم دوراہے پر کھڑی ہے۔
انہوں نے زور دیا کہ انسانیت کو آج امن یا جنگ میں سے ایک راہ چننی ہوگی اور تاریخی سانحات کو دوبارہ ہونے سے روکنا سب کی ذمہ داری ہے۔
صدر شی جن پنگ نے کہا کہ چینی عوام امن کے لیے پُرعزم ہیں اور تاریخ کے درست رخ پر کھڑے ہیں، اور چینی قوم کی ترقی اور خوشحالی کو کوئی نہیں روک سکتا۔
انہوں نے واضح کیا کہ وہ ایسا عالمی نظام چاہتے ہیں جو انصاف اور مساوات پر مبنی ہو، اور چاہے ہم جتنے بھی مضبوط ہوں، کبھی توسیع پسندانہ راستہ اختیار نہیں کریں گے۔
پریڈ میں جدید ترین چینی فوجی ٹیکنالوجی کی بھی نمائش کی گئی، جس میں ہائپر سونک میزائل اور ایٹمی ہتھیار شامل تھے۔
پریڈ میں طویل فاصلے تک مارکرنیوالے بین البراعظمی نیوکلیئر ہتھیار بھی شامل تھے، اس حوالے سے دعوی کیا گیا کہ یہ ہتھیار دنیا میں کہیں بھی ہدف کو نشانہ بنانے کی صلاحیت رکھتے ہیں۔
فوجیوں کے دستوں نے چند ہی لمحوں میں ٹینکوں اور میزائل بردار فوجی گاڑیوں میں سوار ہو کر حیرت انگیز انداز سے پوزیشن لینے کا بھی مظاہرہ کیا۔
