وزیراعظم شہباز شریف 27 تا 29 اکتوبر سعودی عرب کا دورہ کریں گے۔ دفتر خارجہ کے مطابق یہ دورہ سعودی ولی عہد شہزادہ محمد بن سلمان کی دعوت پر ریاض کے لیے ہے۔ وزیراعظم کے ہمراہ نائب وزیراعظم اسحاق ڈار اور کابینہ کے سینئر ارکان بھی اس دورے میں شامل ہوں گے۔
دفتر خارجہ نے بتایا کہ ریاض میں وزیراعظم فیوچر انویسٹمنٹ انیشی ایٹو کے نویں اجلاس میں شرکت کریں گے، جس میں عالمی رہنما، سرمایہ کار اور پالیسی ساز بھی شریک ہوں گے۔
اجلاس کے دوران جدت، پائیداری، معاشی شمولیت اور جیو پولیٹیکل چیلنجز پر تبادلہ خیال کیا جائے گا۔
اس دوران وزیراعظم تجارت، سرمایہ کاری، توانائی اور انسانی وسائل کے شعبوں میں تعاون کے مواقع پر بھی بات کریں گے۔
مزید برآں، وہ دیگر عالمی رہنماؤں اور بین الاقوامی تنظیموں کے سربراہان سے ملاقاتیں کریں گے اور علاقائی و عالمی امور پر تبادلہ خیال کریں گے۔
اس موقع پر پاکستان کے سرمایہ کاری کے مواقع اور پائیدار ترقی کے وژن کو بھی اجاگر کیا جائے گا۔
دفتر خارجہ کے مطابق یہ دورہ اقتصادی، سفارتی اور پائیدار ترقی کے شعبوں میں تعاون کو فروغ دینے کے عزم کی عکاسی کرتا ہے۔
