برطانیہ میں لڑکوں کیلئے "محمد" نام دوسرے سال بھی سب سے مقبول

برطانیہ کے ادارہ شماریات (او این ایس) کے جاری کردہ تازہ اعداد و شمار کے مطابق، 2024 میں پیدا ہونے والے لڑکوں میں سب سے زیادہ بچوں کا نام 'محمد' رکھا گیا۔ یہ نام 2023 میں بھی سرفہرست رہا تھا۔

اعداد و شمار ظاہر کرتے ہیں کہ 'محمد' 2016 سے مسلسل ٹاپ 10 ناموں میں شامل ہے، 2022 میں یہ دوسرے اور 2021 میں پانچویں نمبر پر تھا۔

برطانوی میڈیا کا کہنا ہے کہ یہ رجحان ملک میں بڑھتی ہوئی مسلم آبادی اور اسلامی روایات کی عکاسی کرتا ہے، جہاں والدین نبی کریم ﷺ کے نام کی نسبت سے بچوں کا نام ’محمد‘ رکھنا پسند کرتے ہیں۔

لڑکوں کے دیگر مقبول ناموں میں ’نوح‘ دوسرے اور ’اولیور‘ تیسرے نمبر پر رہے، جبکہ لڑکیوں میں ’اولیویا‘ اور ’امیلیا‘ مسلسل تیسرے سال مقبول ترین نام رہے۔

رپورٹ کے مطابق شاہی خاندان سے منسوب ناموں کی مقبولیت میں کمی دیکھی گئی، ’جارج‘ اب چھٹے اور ’ویلیم‘ 27 ویں نمبر پر آ گیا ہے۔