محکمہ موسمیات نے اسلام آباد، راولپنڈی اور گردونواح کے لیے اہم موسمی انتباہ جاری کیا ہے، جس میں خبردار کیا گیا ہے کہ آئندہ 1 سے 3 گھنٹوں کے دوران ان علاقوں میں آندھی اور گرج چمک کے ساتھ بارش کا سلسلہ مزید شدت اختیار کر سکتا ہے۔
محکمہ کے مطابق اس دوران بعض مقامات پر تیز اور موسلا دھار بارش کا امکان ہے، جس سے مقامی ندی نالوں، خصوصاً نالہ لائی میں پانی کی سطح خطرناک حد تک بلند ہونے کا خدشہ ہے۔
ادارے نے عوام، خصوصاً نالہ لائی کے آس پاس رہائش پذیر افراد کو مشورہ دیا ہے کہ وہ ہوشیار رہیں اور بارش یا ممکنہ طغیانی کی صورت میں تمام ضروری احتیاطی تدابیر اختیار کریں تاکہ کسی بھی ممکنہ حادثے سے بچا جا سکے۔
محکمہ موسمیات نے تمام متعلقہ اداروں اور ریسکیو حکام کو ہائی الرٹ رہنے اور فوری طور پر حفاظتی اقدامات کو یقینی بنانے کی ہدایت کی ہے تاکہ کسی بھی ہنگامی صورت حال سے بروقت نمٹا جا سکے۔
