فرانس کی اسٹارٹ اپ کمپنی کائلی انرجی نے ایک جدید کولنگ سسٹم متعارف کرایا ہے جو روایتی ایئر کنڈیشنرز کے مقابلے میں بجلی کی کھپت کو نمایاں طور پر کم کرتا ہے اور زیادہ مؤثر ٹھنڈک فراہم کرتا ہے۔
کمپنی کے مطابق یہ نظام تقریباً 5 گنا کم بجلی استعمال کرتا ہے اور روایتی اے سی کے مقابلے میں 4 گنا زیادہ ٹھنڈک پیدا کرتا ہے۔
یہ ٹیکنالوجی ایڈیابیٹک کولنگ کے اصول پر مبنی ہے، جو ایک قدرتی اور ماحول دوست طریقہ ہے۔
اس عمل میں پانی بخارات میں تبدیل ہو کر گرمی جذب کرتا ہے، جس سے ہوا ٹھنڈی ہو جاتی ہے، تاہم کائلی انرجی کے سسٹم میں ہوا کا براہِ راست پانی سے رابطہ نہیں ہوتا، جس سے نمی یا ڈیمپنیس کا مسئلہ پیدا نہیں ہوتا جو عام ایئر کولرز میں دیکھا جاتا ہے۔
کمپنی کے مطابق اس سسٹم میں ہر ایک واٹ بجلی کے استعمال سے 14 واٹ کے برابر ٹھنڈک حاصل کی جا سکتی ہے، جو روایتی اے سی یونٹس سے تقریباً پانچ گنا زیادہ مؤثر ہے۔
کائلی انرجی کا یونٹ مکمل طور پر انڈور سسٹم ہے، یعنی اسے کسی بیرونی کمپریسر یا بلاک کی ضرورت نہیں ہوتی اور یہ کوئی مضر فرج گیس استعمال نہیں کرتا، جس سے ماحول پر منفی اثرات بھی کم ہوتے ہیں۔
دلچسپ بات یہ ہے کہ چونکہ یہ سسٹم گرمی کو باہر خارج نہیں کرتا، اس لیے عمارتوں کے اردگرد درجہ حرارت میں بھی اضافہ نہیں ہوتا، جیسا کہ عام اے سی کے استعمال سے ہوتا ہے۔
ماہرین کا کہنا ہے کہ اگر یہ ٹیکنالوجی بڑے پیمانے پر اپنائی گئی تو بجلی کے بلوں میں نمایاں کمی کے ساتھ کاربن اخراج میں بھی بڑی حد تک کمی ممکن ہوگی۔
کائلی انرجی کے بانیوں کا کہنا ہے کہ ان کا مقصد ایک ایسا کولنگ حل فراہم کرنا ہے جو توانائی کے لحاظ سے پائیدار، ماحول دوست اور عام صارف کے لیے قابلِ استطاعت ہو۔
یہ پیش رفت ماحولیاتی تبدیلی کے چیلنجوں کے تناظر میں ایک امید افزا قدم قرار دی جا رہی ہے، خصوصاً ان ممالک کے لیے جہاں گرمی کی شدت میں ہر سال اضافہ ہو رہا ہے۔
