شاہ لطیف ٹاؤن میں گیس کے 3 ہزار غیر قانونی کنکشن کا انکشاف ہوا جنہیں منقطع کر دیا گیا۔
سوئی سدرن گیس کمپنی (ایس ایس جی سی) کے ترجمان نے بتایا کہ شاہ لطیف ٹاؤن میں گیس کے 3 ہزار غیر قانونی کنکشن منقطع کیے، مین ڈسٹری بیوشن لائن سے گیس چوری کی جا رہی تھی۔
ترجمان کے مطابق گیس چوری کے غیر قانونی کنکشن کے ذریعے 2600 گھروں کو گیس دی جا رہی تھی۔
ملزمان کنکشن دینے کے عوض 20 ہزار روپے لیتے اور ماہانہ 1500 روپے وصول کرتے تھے۔
مشتعل افراد کے حملے کے باوجود ایس ایس جی سی ٹیموں نے غیر قانونی کنکشنز منقطع کیے۔
ایس ایس جی سی نے بتایا کہ گیس چوری میں ملوث ملزمان کے خلاف مقدمہ درج کروا دیا گیا، گیس چور مافیا سے چوری کی کارروائی کے تحت دعویٰ درج کیا جائے گا۔
دوسری جانب، ملیر میں یار محمد گوٹھ میں بھی ڈسٹری بیوشن لائن پر غیر قانونی زیر زمین گیس کنکشن پکڑا گیا۔
ترجمان نے بتایا کہ یار محمد گوٹھ کے 400 گھروں کو چوری کی گیس فراہم کی جا رہی تھی، مافیا پیشگی 12000 روپے اور ماہانہ 2000 روپے وصول کر رہے تھے۔
انہوں نے بتایا کہ گیس چور بجلی پیداوار کیلیے سروس لائن سے 2 بھاری گیس جنریٹر بھی استعمال کر رہے تھے۔
جنریٹر اور گیس چوری کیلیے استعمال کلپ اور غیر قانونی پائپ ضبط کر کے مقدمہ درج کروا دیا گیا۔
