سندھ ہائیکورٹ کا غیر اعلانیہ لوڈشیڈنگ پر کے الیکٹرک اور نیپرا پر شدید برہمی کا اظہار، بارہ اگست کو نیپرا اور کے الیکٹرک سے پیش رفت رپورٹ طلب کرلی۔
عدالت نے ریمارکس د ئیے کہ ہم دو ہزار پچیس میں ہیں۔ تھوڑی سی بارش کیا ہوتی ہے بجلی تین، تین گھنٹے بند ہوجاتی ہےسندھ ہائیکورٹ میں کراچی میں بجلی کی غیر اعلانیہ لوڈشیڈنگ کے خلاف جماعت اسلامی کی درخواست پر سماعت ہوئی۔
جسٹس فیصل کمال نے سوال کیا کہ نجکاری کے بعد کے الیکٹرک نے اپنے انفرااسٹرکچر میں کیا بہتری کی ہے؟ بتایا جائے کے الیکٹرک نے اپنے یوٹیلیٹی سروس میں کیا بہتری کی ہے؟
عدالت نے سوال کیا نیپرا کیا کررہا ہے؟شہر میں 12 اور 18 گھنٹے تک کی لوڈشیڈنگ ہورہی ہے، اس پر نیپرا وکیل نے کہا کہ نیپرا نے کے الیکٹرک کو شوکازجاری کیے۔
حال ہی میں کے الیکٹرک پر 2 کروڑ روپے کا جرمانہ عائد کیا گیا۔
عدالت نے کہا کہ اس سے لوڈشیدنگ پر کیا فرق پڑا ہے ؟ کیا کراچی میں بجلی کی لوڈشیڈنگ کا مسئلہ حل ہوگیا ہے؟ نیپرا کے پاس ٹیکنیکل ٹیم ہے یا نہیں؟
جسٹس حسن اکبر نے کہا کہ 2020 میں سی ای او کے الیکٹرک نے بیان دیا تھا کہ صفر لوڈ شیڈنگ کی جارہی ہے، اب 2025 میں تو شہر میں کہیں لوڈ شیڈنگ نہیں ہورہی ہوگی
عدالت نے نیپرا حکام کو حکم دیا کہ سروے کرکے بتائیں کہ کے الیکٹرک کی نجکاری کے بعد انفرااسٹرکچر میں کیا بہتری آئی، یکم اگست تک جماعت اسلامی کی نیپرا کو جمع کرائی شکایت کا فیصلہ کیا جائے۔
