جڑواں شہروں کے مختلف مقامات کو بند کر دیا گیا ہے، اور ریڈ زون تک جانے والے 4 اہم راستے مکمل طور پر بند کر دیے گئے ہیں۔ سرینہ چوک، ایکسپریس چوک، نادرا چوک اور میریٹ چوک پر کنٹینرز لگا کر راستے بند کر دیے گئے ہیں۔
ریڈ زون کے تمام گیٹس کو بھی بند کر دیا گیا ہے۔ رات گئے فیض آباد کو مری روڈ اور فیض آباد بس اڈا پر کنٹینرز لگا کر بند کیا گیا۔
زیرو پوائنٹ پر بھی کنٹینرز لگائے گئے ہیں، جبکہ ایکسپریس وے پر کنٹینرز تو رکھے گئے ہیں لیکن راستہ جزوی طور پر کھلا رکھا گیا ہے، جہاں صرف ایک گاڑی گزر سکتی ہے۔
کنٹینرز کی تنصیب کے باعث راولپنڈی اور اسلام آباد کے درمیان اہم سڑکیں بند ہو گئی ہیں، اور راول روڈ و ناز سینما کو بھی سیل کر دیا گیا ہے۔
ضلعی انتظامیہ کی ہدایت کے مطابق، راولپنڈی اور اسلام آباد میں میٹرو بس سروس بھی معطل رہے گی۔
راول ڈیم چوک سے صدر راولپنڈی جانے والی سڑک اور صدر راولپنڈی سے راول ڈیم چوک جانے والی سڑک دونوں بند کر دی گئی ہیں۔
سوہان موڑ سے آئی جے پی کی طرف سڑک کھول دی گئی ہے۔ آئی جے پی سے راول ڈیم کی طرف سڑک بند ہے۔
دوسری جانب اسلام آباد اور راولپنڈی کی انتظامیہ نے رات 12 بجے سے موبائل، انٹرنیٹ سروس کوبھی بند کر دیا ہے۔
سروس غیر معینہ مدت کے لئے معطل رہے گی۔ اس حوالے سے نوٹیفکیشن بھی جاری کر دیا گیا ہے۔
یہ اقدام مذہبی سیاسی جماعت کے مارچ کے پیش نظر سکیورٹی خدشات کی وجہ سے کیا گیا ہے۔
