وزیراعلیٰ خیبرپختونخوا علی امین گنڈاپور کے وکیل نے کیس ٹائٹل میں نام غلط اور غیر مناسب انداز میں درج کرنے پر چیف جسٹس پشاور ہائی کورٹ کو خط ارسال کیا ہے۔ پشاور ہائی کورٹ میں وزیر اعلیٰ کے پاسپورٹ سے متعلق دائر درخواست کی رسید پر رِٹ برانچ نے نام غلط درج کیا تھا، جس پر وزیر اعلیٰ کے وکیل نے باضابطہ طور پر شکایت کی۔
خط میں مؤقف اختیار کیا گیا کہ کیس ٹائٹل میں علی امین گنڈاپور کا نام غلط لکھنے سے ان کے مؤکل کی ساکھ کو نقصان پہنچا ہے۔
مزید کہا گیا کہ درخواست کی رسید رِٹ برانچ سے غیر مجاز افراد نے حاصل کی، جو تشویشناک ہے۔
خط میں استدعا کی گئی ہے کہ انسٹی ٹیوشن برانچ کے خلاف انکوائری کی جائے اور نام غلط لکھنے سمیت غیر مجاز افراد کو رسید دینے کے ذمہ داروں کے خلاف کارروائی کی جائے۔
