بحیرہ عرب میں پاک بحریہ کے جہاز یرموک نے اربوں روپے کی منشیات ضبط کر لی

متعدد ممالک کے مشترکہ بحری اتحاد کے مطابق پاک بحریہ نے 48 گھنٹوں کے اندر دو کشتیوں کو روکا۔ یہ کارروائیاں سعودی قیادت میں قائم مشترکہ بحری فورس کی براہِ راست مدد میں آپریشن المسمک کے دوران کی گئیں، جو 16 اکتوبر کو شروع ہوا تھا۔

18 اکتوبر کو پہلی کشتی سے 2 ٹن سے زائد کرسٹل میتھ ایمفیٹامین ضبط کی گئی، جس کی مارکیٹ میں مالیت تقریباً 82 کروڑ 20 لاکھ ڈالر تھی۔

48 گھنٹے بعد دوسری کشتی پر کارروائی کرتے ہوئے 350 کلوگرام کرسٹل میتھ (14 کروڑ ڈالر) اور 50 کلوگرام کوکین (1 کروڑ ڈالر) ضبط کی گئی۔

بیان میں بتایا گیا کہ ضبط شدہ منشیات کو جہاز پر واپس لا کر تجزیہ اور تصدیق کے بعد ضائع کیا گیا۔ کشتیوں پر کوئی قومی پرچم نہیں تھا اور ان کا ماخذ معلوم نہیں ہوا۔

سعودی شاہی بحریہ کے کموڈور فہد الجوید نے اس آپریشن کی قیادت کی اور اسے سب سے کامیاب کارروائیوں میں سے ایک قرار دیا، جس سے بین الاقوامی تعاون کی اہمیت واضح ہوئی۔

امریکی مرکزی کمانڈ نے بھی اس کامیاب کارروائی پر مبارک باد دی۔

یہ اتحاد 47 ممالک کی بحری افواج پر مشتمل ہے، جو دنیا کی مصروف ترین تجارتی آبی گزرگاہوں سمیت 30 لاکھ مربع میل سے زائد سمندری علاقے کی نگرانی کرتا ہے تاکہ منشیات اور اسلحے کی اسمگلنگ کو روکا جا سکے۔

پاک بحریہ کے جہاز یرمُوک کا پس منظر

پاکستان نیوی شپ (پی این ایس) یرمُوک کی کمیشننگ تقریب فروری 2020 میں رومانیہ میں منعقد ہوئی تھی، جب کہ اسے دسمبر 2020 میں باضابطہ طور پر پاکستان نیوی کے بیڑے میں شامل کیا گیا تھا۔

یہ جہاز الیکٹرانک وارفیئر، اینٹی شپ، اور اینٹی ایئر پلیٹ فارم ہے، جس میں جدید خود حفاظتی اور ٹرمینل ڈیفنس سسٹمز نصب ہیں، یہ ایک ہی وقت میں متعدد بحری آپریشنز اور بغیر پائلٹ فضائی مشن انجام دینے کی صلاحیت رکھتا ہے۔

مارچ 2024 میں، یرمُوک نے ایک ریسکیو آپریشن میں حصہ لیا تھا، جب 8 ایرانی ماہی گیروں کو لے جانے والی ایک کشتی میں آگ لگ گئی تھی۔

جولائی 2024 میں، یہ جہاز بحرِ ہند میں بھی تعینات کیا گیا تھا، جہاں اس کے ساتھ ایک ہیلی کاپٹر بھی موجود تھا، تاکہ پاکستانی بندرگاہوں کی جانب آنے اور جانے والے تجارتی جہازوں کی حفاظت اور سلامتی کو یقینی بنایا جا سکے۔