ذرائع کے مطابق ہائیکورٹ کے بعض ججز اپنے عہدے سے مستعفی ہونے پر غور کر رہے ہیں، لیکن یہ قدم صرف اسی صورت اٹھائیں گے جب ان کی مدتِ ملازمت اتنی ہو جائے کہ وہ تاحیات پنشن اور ریٹائرمنٹ کے بعد اپنے اور اپنے خاندان کے لیے مراعات کے حق دار بن سکیں۔
اندرونی ذرائع نے بتایا کہ متعلقہ ججز کیلنڈر پر نظر رکھے ہوئے ہیں تاکہ یہ یقینی بنایا جا سکے کہ وہ استعفیٰ صرف اس وقت دیں جب کم از کم 5 سالہ سروس مکمل ہو جائے۔
سپریم کورٹ کے حالیہ فیصلے کے مطابق ہائیکورٹ کے ججز صرف اسی صورت پنشن اور دیگر بعد از ریٹائرمنٹ فوائد کے اہل ہوں گے جب انہوں نے بینچ پر کم از کم 5 سال خدمات انجام دی ہوں۔
سپریم کورٹ پہلے بھی واضح کر چکی ہے کہ ہائیکورٹ کے ججز پنشن اور متعلقہ مراعات کے اہل تبھی ہوں گے جب وہ عدالت میں 5 سالہ مدت مکمل کریں۔ اس مدت سے قبل استعفیٰ دینے کا مطلب ان سہولتوں سے محرومی ہے۔
ذرائع کے مطابق کچھ ججز قبل از وقت ریٹائرمنٹ پر غور کر رہے ہیں اور انہوں نے عدالتی انتظامیہ کے سینئر افسران سے مشاورت بھی کی ہے تاکہ یہ معلوم ہو سکے کہ کیا ایسی کوئی مثال موجود ہے جہاں کسی جج کو 5 سال مکمل کیے بغیر پنشن دی گئی ہو۔
اطلاعات کے مطابق انہیں ایک کیس بتایا گیا، لیکن یہ معاملہ ان کے لیے لاگو نہیں ہوتا، کیونکہ وہ جج ہائیکورٹ میں ترقی سے قبل ضلعی عدلیہ میں طویل عرصہ خدمات انجام دے چکے تھے۔
عدالتی نظام میں ان کی مجموعی سروس کو مدِنظر رکھتے ہوئے انہیں بعد از ریٹائرمنٹ سہولتیں دے دی گئیں حالانکہ انہوں نے ہائی کورٹ بینچ پر پانچ سال پورے نہیں کیے تھے۔
ایک قانونی ذریعے نے انکشاف کیا کہ افسران نے ان پر واضح کیا ہے کہ ایسی نظیر ان ججز پر لاگو نہیں ہو گی جو براہِ راست بار یا دیگر ذرائع سے ہائیکورٹ میں آئے ہوں اور ان کے پاس کوئی سابقہ عدالتی سروس نہ ہو۔
یہ پیشرفت ایک ایسے موقع پر سامنے آئی ہے جب اعلیٰ عدلیہ میں ممکنہ استعفوں کے بارے میں قیاس آرائیاں بڑھ رہی ہیں، یہ افواہیں متنازع 26ویں آئینی ترمیم کے بعد گردش میں آنا شروع ہوئیں۔
تاحال کسی جج نے باضابطہ استعفیٰ نہیں دیا، تاہم اندرونی ذرائع کا کہنا ہے کہ آئندہ چند ماہ میں کچھ ججز مستعفی ہو سکتے ہیں، بالخصوص وہ جو 5 سال کی مدت کے قریب پہنچ رہے ہیں۔
