معروف اداکار فواد خان اور اداکارہ ماہرہ خان کی رومانوی فلم’’نیلوفر‘‘رواں سال کے موسم سرما میں سنیما گھروں میں پیش کردی جائے گی۔
فلم کی شوٹنگ کافی عرصے سے جاری تھی، تاہم ریلیز کی تاریخ واضح نہیں تھی، مگر اب فلم کے مداحوں کے لیے خوشخبری ہے کہ یہ اس موسم سرما میں سنیما سکرینز پر پیش کردی جائے گی۔
انسٹاگرام پر فلم کے حوالے سے کی گئی پوسٹ میں اداکاروں اور فلمسازوں نے لکھا کہ اگلی ملاقات کا انتظار رہے گا، نیلوفر، اس موسم سرما۔
گزشتہ سال جون میں ایک تقریب کے دوران فواد خان نے کہا تھا کہ فلم’’ نیلوفر‘‘ تقریباً شوٹنگ کے آخری مراحل میں ہے اور یہ ان کی آنے والی نئی فلم ہے۔
کوروناوباکی وجہ سے 2020 میں کئی منصوبے تاخیر کا شکار ہوئے تھے جن میں یہ فلم بھی شامل تھی،ماہرہ خان نے ایک انٹرویو میں بتایا تھا کہ شوٹنگ مکمل ہونے میں صرف 10 دن باقی تھے۔
لیکن کووڈ کی وجہ سے سب کچھ رک گیا،بعدازاں جیسے ہی فلم کی شوٹنگ ختم ہوئی۔
ماہرہ خان نے انسٹاگرام پر شوٹنگ کے دوران کھینچی گئی تصاویر شیئر کرتے ہوئے مداحوں کو بتایا کہ فلم کی عکس بندی مکمل کر لی گئی ہے۔
انہوں نے پوسٹ میں ذکر کیا کہ’ ’نیلوفر‘‘ کی پوری ٹیم نے فلم کو شاندار بنانے کے لیے ان تھک محنت کی ہے۔
اگرچہ ’’نیلوفر‘‘کی کہانی کے بارے میں زیادہ تفصیلات نہیں بتائی گئیں، تاہم ماضی میں ماہرہ خان نے اشارہ کیا تھا کہ فلم کی کہانی رومانوی نوعیت کی ہے.
فلم کی کہانی امر رسول نے لکھی ہے اور وہی فلم کے ہدایتکار بھی ہیں، جبکہ اسے اوصاف شارق نے پروڈیوس کیا ہے۔
