ملک میں آج کاروباری روز کے دوران سونے کی قیمت تاریخ کی بلند ترین سطح پر پہنچ گئی۔
آل پاکستان جیمز اینڈ جیولرز ایسوسی ایشن نے بتایا کہ فی تولہ سونا 1500روپے اضافے سے 4 لاکھ 16 ہزار 778 روپے کا ہوگیا۔
اسی طرح 10گرام سونا 1286 روپے بڑھ کر 3 لاکھ 57 ہزار 319 روپے کا ہوگیا جبکہ عالمی مارکیٹ میں سونا 15 ڈالر اضافے سے فی اونس 3955 ڈالر کا ہوگیا۔
ماہرین کے مطابق ڈالر کی قدر میں اتار چڑھاؤ اور عالمی مارکیٹ میں بڑھتی مانگ مقامی سطح پر بھی سونے کی قیمتوں میں اضافے کا باعث بنی ہے۔
یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے۔
جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
