جنوبی افریقا کے وکٹ کیپر بیٹر کوئنٹن ڈی کوک نے ٹی ٹوئنٹی انٹرنیشنل کرکٹ میں ایک ناپسندیدہ ریکارڈ اپنے نام کر لیا۔ لاہور کے قذافی اسٹیڈیم میں ہفتے کو پاکستان کے خلاف تیسرے اور آخری ٹی ٹوئنٹی میچ کے پہلے ہی اوور میں وہ شاہین شاہ آفریدی کی گیند پر بغیر کوئی رن بنائے آؤٹ ہوگئے۔
اس کے ساتھ ہی ڈی کوک ٹی ٹوئنٹی انٹرنیشنل میں سب سے زیادہ صفر پر آؤٹ ہونے والے جنوبی افریقی کھلاڑی بن گئے۔
ڈی کوک نے اب تک 96 ٹی ٹوئنٹی میچز میں اپنی ٹیم کی نمائندگی کی ہے، جس دوران وہ 8 مرتبہ بغیر رن بنائے پویلین لوٹے یہ کسی بھی جنوبی افریقی بلے باز کا سب سے زیادہ “ڈک” ریکارڈ ہے۔
اس فہرست میں آل راؤنڈر اینڈائل فیلوک وائیو 7 مرتبہ صفر پر آؤٹ ہوکر دوسرے نمبر پر ہیں، جبکہ ٹمبا باووما، جے پی ڈومنی اور ریزا ہینڈرکس 6،6 مرتبہ صفر پر آؤٹ ہوکر مشترکہ طور پر تیسرے نمبر پر ہیں۔
دوسری جانب پاکستان کے صائم ایوب بھی جنوبی افریقہ کے خلاف اسی میچ میں بغیر رن بنائے آؤٹ ہوکر ایک ناپسندیدہ ریکارڈ کے ہم شریک بن گئے۔
صائم نے ٹی ٹوئنٹی انٹرنیشنل میں پاکستانی بیٹر کے طور پر سب سے زیادہ صفر پر آؤٹ ہونے کا ریکارڈ برابر کر دیا۔
صائم ایوب اپنے 51 ویں ٹی ٹوئنٹی انٹرنیشنل میچ میں 10ویں بار صفر پر آؤٹ ہوئے ۔ اس طرح وہ عمر اکمل کے برابر آگئے،جو 84 میچز میں اتنے ہی بار صفر پر آؤٹ ہوئے۔
سابق کپتان شاہد آفریدی اور بابر اعظم 8 ، جبکہ کامران اکمل، محمد نواز اور محمد حفیظ 7، 7 بار صفر پر آؤٹ ہوچکے ہیں۔
