اسلام آباد، پنجاب، بالائی خیبر پختونخوا اور آزاد کشمیر میں آج مختلف مقامات پر بارش کی پیشگوئی کی گئی ہے۔ پاکستان میں مون سون کا سلسلہ جاری ہے جس کے باعث ملک کے کئی حصوں میں بارشوں کا سلسلہ دیکھنے میں آ رہا ہے۔
صبح کے وقت لاہور کے مختلف علاقوں میں ہلکی بارش سے موسم خوشگوار ہو گیا، جبکہ محکمہ موسمیات نے اسلام آباد، پنجاب، بالائی خیبر پختونخوا اور آزاد کشمیر میں آج مزید بارش ہونے کا امکان ظاہر کیا ہے۔
مزید برآں، محکمہ موسمیات کے مطابق آئندہ 24 گھنٹوں میں کراچی میں مطلع ابر آلود اور موسم مرطوب رہنے کا امکان ہے، جبکہ صبح اور رات کے اوقات میں بعض مقامات پر ہلکی بوندا باندی ہو سکتی ہے۔
محکمہ موسمیات کے مطابق شہر کا کم سے کم درجہ حرارت 27 ڈگری سینٹی گریڈ ریکارڈ ہوا جبکہ زیادہ سے زیادہ درجہ حرارت 32 سے 34 ڈگری سینٹی گریڈ کے درمیان رہنے کی توقع ہے۔
محکمہ موسمیات نے مزید بتایا کہ ہوا میں نمی کا تناسب 67 فیصد ہے اور شہر میں جنوب مغرب سے سمندری ہوائیں 20 سے 25 کلو میٹرفی گھنٹہ کی رفتار سے چل رہی ہیں۔
