اسٹے سیکیور سروے کے مطابق ہر 4 میں سے 3 صارفین نے بتایا کہ انہوں نے گزشتہ مہینے ڈیجیٹل ادائیگی کی، خصوصاً کورونا کے بعد سے جواب دہندگان میں سے تقریباً نصف افراد اسٹورز میں زیادہ تر ڈیجیٹل ادائیگیوں کا استعمال کر رہے ہیں-
’ویزا‘ اور ’دراز‘ کی جانب سے کیے گئے سروے کے مطابق آن لائن شاپنگ کرنے والے صارفین کی بڑی تعداد کارڈ کے ذریعے ادائیگی کو ترجیح دیتی ہے۔
63 فیصد صارفین کے مطابق اس کی دوسری بڑی وجہ ان کی ادائیگی کے ڈیٹا کو محفوظ رکھے جانے کی ضمانت ہے۔
یہی رجحان اسٹور میں بھی دیکھا گیا جس میں 63 فیصد صارفین نے ڈیجیٹل ادائیگی کے آپشنز پر غور کرتے وقت فروخت کنندہ کی محفوظ ادائیگی کی سہولت کو سرفہرست عنصر قرار دیا، اس کے بعد 44 فیصد صارفین نے گارنٹی اور واپسی کی پالیسیوں جبکہ 43 فیصد نے سہولت اور رفتار کو اہم عنصر قرار دیا۔
صارفین کی 85 فیصد اکثریت نے کہا کہ وہ پیش کردہ ادائیگی کے طریقوں کی بنیاد پر اسٹورز یا آن لائن شاپنگ ویب سائٹس اور موبائل ایپلی کیشنز کو تبدیل کرتے ہیں، ان میں سے زیادہ تر صارفین نقد کی بجائے ڈیجیٹل ادائیگیوں کو اہم ترجیح دیتے ہیں۔
سروے سے معلوم ہوا کہ 42 فیصد صارفین نے ہوٹل، ریسٹورنٹس یا سیاحتی مقامات اور یوٹیلیٹیز پر ٹپ کے لیے نقد رقم استعمال کرنے کو ترجیح دی۔
اگرچہ صارفین کی 75 فیصد اکثریت نے کہا کہ وہ دھوکا دہی یا اسکینڈل کو پہچاننے میں ماہر ہیں لیکن سروے کیے گئے صارفین میں سے ایک تہائی اب بھی اس معاملے میں مشکل کا سامنا کر رہے ہیں۔
جواب دہندگان کی 82 اکثریت یہ جاننا چاہتی ہے کہ ان کی ذاتی معلومات کو ای کامرس سائٹ کو فراہم کرنے سے پہلے کیسے سنبھالا اور محفوظ رکھا جاتا ہے۔
مزید برآں 75 فیصد جواب دہندگان نے کہا کہ وہ یہ جاننا چاہیں گے کہ کس طرح سیکیورٹی ٹیکنالوجی نے ڈیجیٹل ادائیگی کے طریقہ کار کو قابل اعتماد بنانے کے لیے کام کیا جس سے مالیاتی اداروں، ادائیگیوں کی کمپنیوں سمیت دیگر اسٹیک ہولڈرز اور حکومتوں کے ذریعے صارفین کی آگہی کی اہمیت کو تقویت ملی۔
