کورونا وائرس کے دوران ڈسکوز کے معاشی پیکج میں بڑے گھپلوں کا انکشاف ہوا ہے۔ آڈیٹر جنرل آف پاکستان نے اس حوالے سے خصوصی رپورٹ جاری کردی۔ رپورٹ کے مطابق 2019 تا 2021 کورونا کے عرصے میں چھوٹے اور درمیانے درجے کے صنعتکاروں کو 106 ارب روپے کا معاشی پیکج دیا گیا۔
تاہم ڈسکوز نے پاور ڈویژن اور پاور انفارمیشن کمپنی کی ہدایات پر عمل نہیں کیا۔
دستاویز کے مطابق پیکج میں ایک لاکھ سے زائد ایسے صارفین کو شامل کیا گیا جو اہل نہیں تھے، حتیٰ کہ غیر قانونی کنکشن رکھنے والے 588 صارفین کو بھی فائدہ پہنچایا گیا۔
مزید برآں، ایک لاکھ 44 ہزار سے زائد ڈیفالٹرز کو بھی پیکج کے ذریعے 1 ارب 39 کروڑ روپے سے زیادہ کی ادائیگی کی گئی۔
رپورٹ میں بتایا گیا کہ تقریباً 97 ہزار صارفین کو ایک ارب روپے کی سبسڈی بغیر تصدیق فراہم کی گئی، جن صنعتکاروں کے نام پر پہلے سے کئی کنکشن موجود تھے۔
رپورٹ کے مطابق 7 ارب 77کروڑ سے زائد سبسڈی ایسے صارفین کودی گئی جو پیکج کی مقررہ مدت کے بعد شامل ہوئے، 57 ہزار ایسے صارفین کو پیکج میں شامل کیا گیا جنہوں نے بعد میں کنکشنز لیے۔
11 ہزار سے زائد ایسے صارفین کو شامل کیا گیا جن کے مستقل ایڈریس کا ثبوت نہیں مل رہا، معاشی پیکج میں 2 ارب 43 ہزار روپے اضافی سبسڈی دینے کا بھی انکشاف ہوا ہے۔
