ایشین کرکٹ کونسل (اے سی سی) کے صدر محسن نقوی نے بھارت کے خط کا باضابطہ جواب دیتے ہوئے ایشیا کپ ٹرافی سے متعلق اپنا دو ٹوک مؤقف واضح کردیا۔ ذرائع کے مطابق، بھارتی کرکٹ بورڈ (بی سی سی آئی) نے ایشیا کپ 2025 کی ٹرافی وصول کرنے کے لیے اے سی سی صدر محسن نقوی کو خط ارسال کیا تھا۔
ذرائع کا کہنا ہے کہ محسن نقوی نے جواب میں کہا ہے کہ اگر بھارتی بورڈ ٹرافی حاصل کرنا چاہتا ہے تو اس کے لیے ایک باقاعدہ تقریب منعقد کی جاسکتی ہے جس میں وہ آکر ٹرافی وصول کریں۔
ذرائع کے مطابق، ایشین کرکٹ کونسل نے بھارتی بورڈ کو آگاہ کیا ہے کہ ٹرافی حوالگی کی تقریب نومبر کے پہلے ہفتے میں دبئی میں منعقد کرنے کی تجویز دی گئی ہے۔
مزید بتایا گیا کہ محسن نقوی نے اپنے مؤقف میں واضح کیا کہ بھارتی بورڈ کا کوئی عہدیدار ایک کھلاڑی کے ہمراہ آکر تقریب میں ٹرافی وصول کرسکتا ہے۔
ذرائع کے مطابق، اے سی سی نے اس فیصلے کو حتمی قرار دیتے ہوئے بھارتی بورڈ کو باضابطہ طور پر مطلع کردیا ہے۔
واضح رہے کہ ایشیا کپ 2025 کی فاتح بھارتی ٹیم نے اے سی سی کے صدر محسن نقوی سے فائنل میچ جیتنے کے بعد ٹرافی وصول نہیں کی تھی جس پر محسن نقوی نے ٹرافی واپس اے سی سی کے دفتر بھجوا دی تھی۔
بھارتی بورڈ کی ہٹ دھرمی پر محسن نقوی نے کہا تھا کہ اگر بھارتی کپتان کو ٹرافی چاہیے تو میرے دفتر آکر لے جائیں۔
