آسٹریلوی فاسٹ بولر مچل اسٹارک نے ٹی ٹوئنٹی انٹرنیشنل کرکٹ سے فوری ریٹائرمنٹ کا اعلان کر دیا ہے۔ کرکٹ آسٹریلیا کے مطابق، اسٹارک نے اپنے توجہ کا مرکز ٹیسٹ اور ون ڈے کرکٹ رکھنے کے لیے یہ فیصلہ کیا ہے۔
35 سالہ فاسٹ بولر، جنہوں نے پچھلے سال ٹی ٹوئنٹی ورلڈ کپ کے بعد سے کوئی ٹی ٹوئنٹی انٹرنیشنل میچ نہیں کھیلا، اب صرف ٹیسٹ اور ون ڈے میچز کے لیے آسٹریلوی ٹیم کے دستیاب ہوں گے۔
اس کے ساتھ ہی، اسٹارک ڈومیسٹک ٹی ٹوئنٹی لیگز، بشمول انڈین پریمیئر لیگ میں کھیلتے رہیں گے۔
آسٹریلوی میڈیا کے مطابق، اسٹارک نے اپنے بیان میں کہا کہ ٹیسٹ کرکٹ ہمیشہ سے ان کی سب سے بڑی ترجیح رہی ہے۔
اسٹارک نے کہا کہ میں نے آسٹریلیا کے لیے کھیلے گئے ہر ایک ٹی ٹوئنٹی میچ کو انجوائے کیا، 2021 کا ٹی ٹوئنٹی ورلڈ کپ جیتنا خاص لمحہ تھا۔
واضح رہے کہ مچل اسٹارک نے آسٹریلیا کیلئے 65 ٹی ٹوئنٹی انٹرنیشنل کھیلے جس میں انہوں نے 79 وکٹیں حاصل کیں۔
