پاکستانی خواتین باکسرز نے چین میں جاری تھرڈ بیلٹ اینڈ روڈ انٹرنیشنل باکسنگ گالا میں شاندار کارکردگی کا مظاہرہ کیا۔ تفصیلات کے مطابق، پاک آرمی کی عائشہ ممتاز ویمنز انڈر 18 کی 48 کلوگرام کیٹیگری کے فائنل میں پہنچ گئیں اور پاکستان کے لیے سلور میڈل حاصل کیا۔
اس گالا میں دنیا کے 26 ممالک کی 34 ٹیمیں شریک تھیں، جبکہ پاک آرمی کی دیگر کھلاڑی ملائکہ زاہد اور ماریا بھی سیمی فائنلسٹ کے مرحلے تک پہنچنے میں کامیاب رہیں۔
پاکستانی مرد باکسرز نے بھی عالمی سطح پر شاندار کارکردگی دکھائی۔ پاک آرمی کے قدرت اللہ سیمی فائنلسٹ رہے، جبکہ حذیفہ راحیل (پنجاب) اور ضمیر علی (کے پی) کوارٹر فائنلسٹ قرار پائے۔
پاکستان باکسنگ فیڈریشن کی چیئرپرسن بیگم عشرت اشرف نے کہا کہ پاکستانی کھلاڑیوں نے نہ صرف جیت حاصل کی بلکہ اپنے جرأت، ڈسپلن اور عزم سے دنیا بھر کو متاثر کیا۔
صدر پاکستان باکسنگ فیڈریشن لیفٹیننٹ کرنل (ر) محمد ناصر اعجاز نے کہا کہ عالمی سطح پر خواتین کھلاڑیوں کی یہ کامیابی پاکستان باکسنگ کے لیے ایک تاریخی لمحہ ہے۔
انہوں نے کہا کہ بیٹیوں نے بے مثال ہمت سے دنیا کو پیغام دیاکہ پاکستان عالمی باکسنگ میں ناقابلِ نظرانداز قوت ہے۔ ہم نے کھلاڑیوں کو سخت محنت، جدید تربیت اور بہترین سہولتیں فراہم کیں۔
کرنل (ر) محمد ناصر اعجاز نے مزید کہا کہ یہ کامیابیاں آنے والے کل کی بنیاد ہیں، کھلاڑیوں کو ہر ممکن سہولت فراہم کرتے رہیں گے۔
انہوں نے کہا کہ شاندار نتائج قومی ٹریننگ کیمپ کی باقاعدہ تیاریوں اور کوچز کی انتھک محنت کا ثمر ہیں۔
