دریائے سندھ میں آج انتہائی اونچے درجے کے سیلاب کا امکان ظاہر کیا گیا ہے۔ گڈو بیراج کے مقام پر پنجاب سے سیلابی پانی کا سلسلہ جاری ہے، جس کی وجہ سے کشمور کے کچے علاقے خطرے میں ہیں۔ کوٹ مٹھن کے مقام پر پانی کی سطح میں اضافہ ہوگیا، جس کے بعد کچے علاقوں سے بڑی تعداد میں لوگ محفوظ مقامات کی جانب منتقل ہو رہے ہیں۔
انتظامیہ نے ایک بار پھر عوام سے اپنے گھر خالی کرنے کی اپیل کی ہے۔
ادھر کھیرتھر میں بارشوں سے ندی نالوں میں طغیانی آگئی ہے۔ صوبائی وزیر آبپاشی جام خان شورو کا کہنا ہے کہ سندھ میں کوئی بند نہیں توڑا جائے گا۔
حکومت نے سپر فلڈ کے لیے مکمل تیاری کر رکھی ہے، انتظامات مکمل ہیں اور اندازہ ہے کہ ڈیڑھ سے دو لاکھ آبادی متاثر ہوسکتی ہے۔
دریاؤں اور بیراجوں میں پانی کی آمد و اخراج کے اعداد و شمار جاری
صوبائی رین اینڈ فلڈ ایمرجنسی مانیٹرنگ سیل نے دریاؤں اور بیراجوں میں پانی کی آمد و اخراج کے اعداد و شمار جاری کردیے۔
گڈو بیراج پر پانی کی آمد 4 لاکھ25 ہزار اور اخراج 4 لاکھ 16 ہزار 763 کیوسک ریکارڈ کیا گیا جبکہ سکھر بیراج پر پانی کی آمد 3 لاکھ 52 ہزار اور اخراج 3 لاکھ 29 ہزار 310 کیوسک ریکارڈ کیا گیا۔
کوٹری بیراج پر پانی کی آمد 2 لاکھ 35 ہزار 243 کیوسک جبکہ اخراج 2 لاکھ 31 ہزار 763 کیوسک ریکارڈ کیا گیا۔
ادھر پنجند بیراج پر پانی کی آمد اور اخراج 5 لاکھ 24 ہزار 765 کیوسک ریکارڈ کیا گیا جبکہ تریموں بیراج پر پانی کی آمد اور اخراج 5 لاکھ 31 ہزار 993 کیوسک ریکارڈ کیا گیا ہے۔
