ڈائریکٹر جنرل پروونشل ڈیزاسٹر منیجمنٹ اتھارٹی (پی ڈی ایم اے) پنجاب، عرفان علی کاٹھیا نے کہا ہے کہ سیلاب کی وجہ سے ملتان پچھلے 48 گھنٹوں سے دباؤ میں ہے۔ انہوں نے کہا کہ آئندہ 2 دن ملتان کے لیے آسان نہیں ہوں گے۔
ان کا کہنا تھا کہ توقع تھی کہ 4 ستمبر تک پنجند پر پانی اپنی انتہا کو پہنچ جائے گا اور 6 ستمبر تک سندھ میں داخل ہو جائے گا۔
انہوں نے مزید کہا کہ پنجاب میں اتنی زیادہ سیلابی صورتحال پیدا ہو گئی ہے کہ پانی اپنی متوقع رفتار سے آگے نہیں بڑھ سکا۔
یاد رہے کہ 5 لاکھ 40 ہزار کیوسک کا سیلابی ریلا 2 روز تک ملتان کی حدود میں داخل ہوگا۔
محکمہ انہار نے دریائے چناب میں سیلاب کی موجودہ صورتحال کے پیش نظر شیر شاہ بند میں شگاف ڈالنے کا فیصلہ کر لیا ہے۔
ذرائع محکمہ انہار کے مطابق شیر شاہ بند پر بیٹھے ہوئے افراد اور ملحقہ آبادی کو اطلاع دے دی گئی ہے، شگاف پڑنےکی صورت میں متاثرہ علاقےخالی کرنےکے اعلانات کیے جارہے ہیں۔
ذرائع کا بتانا ہے کہ دریائےچناب کے بیٹ کے علاقے پہلے ہی پانی سے بھر چکے ہیں، مزید گنجائش نہ ہونے کے باعث بریچنگ کا فیصلہ کیاگیا۔
