کراچی میں رہائش پذیر دو افغانی نوجوانوں کی ویڈیو وائرل ہوئی تھی، جس میں وہ افغان مہاجرین کے انخلا کے معاملے پر پاکستان کے خلاف نازیبا الفاظ استعمال کر رہے تھے۔ ویڈیو میں ایک نوجوان کی شناخت فرہاد کے نام سے ہوئی، جو ایک کریانے کی دکان میں کام کرتا تھا۔ یہ ویڈیو خریداروں نے بنائی اور انٹرنیٹ پر شیئر کر دی تھی۔
ویڈیو وائرل ہونے کے بعد اب فرہاد کی ایک نئی ویڈیو سامنے آئی ہے، جس میں وہ روتے ہوئے اپنے کیے پر نادم ہیں اور معافی مانگ رہے ہیں۔
نئی ویڈیو میں فرہاد نے کہا کہ "مجھ سے بڑی غلطی ہوئی ہے اور میں اس پر شرمندہ ہوں"، ساتھ ہی انہوں نے "پاکستان زندہ باد" اور "سندھ پولیس زندہ باد" کے نعرے بھی لگائے۔
ویڈیو میں فرہاد کان پکڑ کر روتے ہوئے کہتے ہیں "مجھ سے بہت بڑی غلطی ہوئی ہے جو آئندہ نہیں ہوگی۔"
دوسری ویڈیو ایک افغانی نوجوان محب اللہ کی تھی جو ایک چائے کے ہوٹل پر کام کرتا ہے، وائرل ویڈیو میں محب اللّٰہ بھی پاکستان کو برا بھلا کہہ رہا تھا تاہم نئی ویڈیو میں محب اللّٰہ نے پرانی ویڈیو پر معافی مانگ کر شرمندگی کا اظہار کیا۔
