وزیرِاعظم شہباز شریف امریکی صدر ڈونلڈ ٹرمپ اور مصری صدر عبدالفتاح السیسی کی خصوصی دعوت پر شرم الشیخ پہنچ گئے۔ مصر کے شہر شرم الشیخ ایئرپورٹ پر مصری وزیر برائے یوتھ اینڈ اسپورٹس ڈاکٹر اشرف صبحی، پاکستان کے سفیر عامر شوکت اور دونوں ممالک کے اعلیٰ سفارتی حکام نے وزیرِاعظم کا پرتپاک استقبال کیا۔
وزیرِاعظم شرم الشیخ میں ہونے والے غزہ جنگ بندی سے متعلق امن سربراہی اجلاس میں شرکت کریں گے۔ نائب وزیرِاعظم و وزیرِخارجہ اسحٰق ڈار اور وفاقی وزیرِاطلاعات و نشریات عطااللہ تارڑ بھی وفد کا حصہ ہیں۔
وزیرِاعظم شہباز شریف اجلاس کے دوران امریکی صدر ڈونلڈ ٹرمپ، مصری صدر عبدالفتاح السیسی، امیرِقطر شیخ تمیم بن حمد الثانی اور ترکیہ کے صدر رجب طیب ایردوان کے درمیان غزہ امن معاہدے پر دستخط کی تقریب میں خصوصی طور پر شریک ہوں گے۔
ذرائع کے مطابق، شرم الشیخ سربراہی اجلاس اُن سفارتی کوششوں کا تسلسل ہے جو گزشتہ ماہ نیویارک میں اقوام متحدہ کی جنرل اسمبلی کے 80ویں اجلاس کے دوران شروع ہوئی تھیں۔
یاد رہے کہ وزیراعظم پاکستان نے 23 ستمبر 2025 کو نیویارک میں امریکی صدر سے سات عرب و اسلامی ممالک مصر، اردن، قطر، سعودی عرب، متحدہ عرب امارات، انڈونیشیا اور ترکیہ کے سربراہان کے ہمراہ ملاقات میں غزہ میں دیرپا امن کے امکانات پر تفصیلی تبادلہ خیال کیا تھا۔
عرب و اسلامی ممالک نے ایک مشترکہ بیان کے ذریعے صدر ٹرمپ کی امن کے حصول کی کوششوں کو سراہا تھا اور اس عزم کا اعادہ کیا تھا کہ وہ امریکا کے ساتھ مل کر ایک جامع اور پائیدار جنگ بندی کے قیام اور غزہ میں سنگین انسانی صورتحال کے ازالے کے لیے مشترکہ طور پر کام کریں گے۔
